മാധ്യമങ്ങൾക്ക് ഗജകേസരി യോഗം  

1975 ജൂൺമാസം 25ന് ഇന്ദിരാഗാന്ധി രാജ്യത്ത് പ്രഖ്യാപിച്ച അടിയന്തിരാവസ്ഥ 19 മാസത്തോളം നിലനിന്നു. ഓരോ ഇന്ത്യൻ പൗരനും ഭരണഘടന അനുവദിച്ചുതരുന്ന ‘അഭിപ്രായസ്വാതന്ത്ര്യം’, ‘ആവിഷ്കാര സ്വാതന്ത്ര്യം’ മുതലായ മൗലികാവകാശങ്ങൾ ഈ കാലയളവിൽ നിഷേധിക്കപ്പെട്ടു. അടിയന്തിരാവസ്ഥയുടെ മറവിൽ നടക്കുന്ന ഭരണകൂട ഭീകരതയും മനുഷ്യാവകാശ ലംഘനങ്ങളും ജനങ്ങളിൽ എത്താതിരിക്കാൻ വാർത്തകൾക്കു സെൻസർഷിപ് ഏർപ്പെടുത്തി. വാർത്താമാധ്യമങ്ങളുടെ വായ മൂടിക്കെട്ടി. പല പ്രമുഖ പത്രമുടമകളെയും പത്രാധിപന്മാരെയും തുറുങ്കിലടച്ചു. 1971ൽ പാസ്സാക്കിയ ‘ആഭ്യന്തര സുരക്ഷാ പരിപാലന നിയമം’ (MISA) എന്ന കരിനിയമം ഉപയോഗിച്ച് മാധ്യമങ്ങളെയും മാധ്യമപ്രവർത്തകരെയും സർക്കാർ വേട്ടയാടി. ആകാശവാണിയും ദൂരദർശനും സർക്കാർ അനുകൂലവാർത്തകൾ മാത്രം പ്രക്ഷേപണം ചെയ്യുന്ന പ്രചാരണ യന്ത്രങ്ങളായി മാറി.

നിലവിൽ ഭാരതത്തിൽ പ്രഖ്യാപിത അടിയന്തിരാവസ്ഥ ഇല്ലെങ്കിലും മാധ്യമങ്ങൾക്കും മാധ്യമപ്രവർത്തകർക്കും പഴയ പ്രവർത്തനസ്വാതന്ത്ര്യമില്ല എന്നത് ഒരു വസ്തുതയാണ്. ലോക മാധ്യമ സ്വാതന്ത്ര്യ സൂചിക അനുസരിച്ചു 180 രാജ്യങ്ങൾ ഉൾപ്പെട്ട ലിസ്റ്റിൽ ഇന്ത്യയുടെ സ്ഥാനം 161 ആണ്. അയൽ രാജ്യങ്ങളായ പാകിസ്ഥാനും ശ്രീലങ്കയും നമ്മെക്കാൾ മെച്ചപ്പെട്ട സ്ഥാനങ്ങളിലാണുള്ളത്. കേന്ദ്ര സർക്കാരിനെതിരെ വാർത്തകൾ എഴുതിയാൽ മാവോയിസ്റ് മുദ്രകുത്തി ജയിലിൽ അടക്കുമോ എന്ന ഭയം റിപോർട്ടർമാർക്കുണ്ട്. ഇ.ഡിയും NIAയും വാതിലിൽ വന്നു മുട്ടിവിളിക്കുമോ എന്ന ആശങ്കയിലാണ് പത്രമുടമകളും. കേരള സർക്കാരിന്റെയും കോർപ്പറേറ്റ് വമ്പന്മാരുടെയും കളങ്കിത സ്വർണ്ണവ്യാപാരികളുടെയും പരസ്യങ്ങൾ ലഭിക്കുന്നതുകൊണ്ടു പല പ്രമുഖപത്രങ്ങളും സർക്കാരിന്റെ ജനദ്രോഹ നയങ്ങളെയോ ധൂർത്തിനെയോ കുറിച്ച് എഴുതാൻ മടിക്കുന്നു. സ്വർണ്ണകടത്തിനെകുറിച്ചോ ഭൂമാഫിയ പ്രവർത്തനങ്ങളെകുറിച്ചോ വരുന്ന വാർത്തകൾ പ്രസിദ്ധീകരിക്കാതെ തമസ്കരിക്കുന്നു. വാർത്തകൾക്കു വിലപേശുകയും സ്ഥാനാർഥികളിൽനിന്നു പണം വാങ്ങി അവരുടെ സ്തുതിപാഠകരാവുകയും ചെയ്യുന്ന നിലവാരത്തിലേക്ക് പല മാധ്യമങ്ങളും താണു.

രാഷ്ട്രീയ പ്രബുദ്ധതകൂടുതലുള്ള ഒരു ജനതയാണ് മലയാളികൾ. അതുകൊണ്ടുതന്നെ എല്ലാ മലയാളപത്രങ്ങളിലും രാഷ്ട്രീയ വർത്തകൾക്കായിരുന്നു പ്രാധാന്യം. എന്നാൽ അടിയന്തിരാവസ്ഥാ നാളുകളിൽ രാഷ്ട്രീയ വാർത്തകൾ റിപ്പോർട്ട്ചെയ്യാൻ നീയന്ത്രണങ്ങളും വിലക്കും നിലവിലിരുന്നതിനാൽ പത്രങ്ങൾ ശരിക്കും വിഷയ ദാരിദ്ര്യം അനുഭവിക്കയുണ്ടായി. പലപ്പോഴും അതിനെ മറികടന്നിരുന്നത് ആനകളെ കുറിച്ചുള്ള വർത്തകൾ എഴുതി പ്രസിദ്ധികരിച്ചാണ്. ഗജവീരന്മാരായ ഗുരുവായൂർ കേശവനും തിരുവമ്പാടി ചന്ദ്രശേഖരനും കവളപ്പാറക്കൊമ്പനും അങ്ങനെ വാർത്തകളിൽ നിറഞ്ഞു. ഒരുപക്ഷെ ഭാരതത്തിൽ തന്നെ ഏറ്റവും അധികം ആനകളെ സ്‌നേഹിക്കുന്ന ജനങ്ങൾ ഉള്ളതു കേരളത്തിലാണ്. നെറ്റിപ്പട്ടം കെട്ടിയ കൊമ്പൻ ആനകളെ എഴുന്നെള്ളിക്കാത്ത ഉത്സവവും, പെരുന്നാളും, ചന്ദനക്കുടവും മലയാളിക്ക് സങ്കല്പിക്കാനാവില്ല. വാദ്യമേള ലഹരിയിൽ പൂത്തുലയുന്ന പുരുഷാരത്തിനു നടുവില്‍ വര്‍ണ്ണരാജിയുടെ അകമ്പടിയോടെ, ചെവികൾ ആട്ടി, തലയെടുപ്പോടെ നിരനിരയായി ഉയർന്നുനിൽക്കുന്ന ഗജരാജന്മാരെ ഒരുനോക്കു കാണാൻ വിദേശികൾ പോലും ഉത്സവകാലത്തു കേരളത്തിൽ എത്തുന്നു. ആന എന്നും മലയാളിക്ക് ഒരു ഹരമാണ് എന്നറിയാവുന്നതുകൊണ്ടാണു മാധ്യമങ്ങൾ വാർത്താദാരിദ്യം അനുഭവപ്പെടുമ്പോൾ ആനകഥകളുമായി വരുന്നത്.

പണ്ടൊക്കെ നാട്ടാനകളുടെ കഥയായിരുന്നു എഴുതിയിരുന്നതെങ്കിൽ കഴിഞ്ഞ ചില ദിവസങ്ങളായി തുടർച്ചയായി മാധ്യമങ്ങളിൽ നിറയുന്നത് കാട്ടാനകളുടെ വിക്രീയകളാണ്. അരിക്കൊമ്പനും ചക്കകൊമ്പനും ചെത്തുകൊമ്പനും പടയപ്പയുമാണ് ഇപ്പോൾ നാട്ടിൽ താരങ്ങൾ. മനുഷ്യൻ കാട്ടിൽ കയറി വന്യമൃഗങ്ങളുടെ ആവാസവ്യവസ്ഥക്കു ഗുരുതരമായ ആഘാതം ഏൽപ്പിക്കുമ്പോൾ വന്യമൃഗങ്ങൾ നാട്ടിലേക്കിറങ്ങുന്നു. വലിപ്പവും ശക്തിയുമുള്ള ആനകൾ നാട്ടുകാരുടെ വീടുകളും കൃഷിയും നശിപ്പിക്കുന്നു. മുൻപിൽ വന്നുപെടുന്നവരെ ആക്രമിച്ചു കൊല്ലുന്നു. സഹികെടുമ്പോൾ ജനം സമരവുമായി തെരുവിലിറങ്ങുന്നു. വനംവകുപ്പ് ഉദ്യോഗസ്ഥർ ആനയെ മയക്കുവെടിവെച്ചു കുങ്കിയാനകളുടെ സഹായത്തോടെ ലോറിയിൽ കയറ്റി നാടുകടത്തുന്നു. ക്യാമറയും തൂക്കി മാധ്യമപ്രവർത്തകർ ഇതിന്റെയെല്ലാം പുറകെ പായുന്നു. ചിന്നക്കനാൽ-ശാന്തൻപാറ പ്രദേശത്തു ഭീതിവിതച്ച അരിക്കൊമ്പൻ എന്ന ആനയെ പെരിയാർ കടുവ സങ്കേതത്തിലേക്കു ഇപ്രകാരം നാടുകടത്തുന്നതുമായി ബന്ധപെട്ട ഉദ്വേഗജനകമായ വാർത്തയുടെ തത്സമയ റിപ്പോർട്ടിങ്ങിന്റെ തിരക്കിലായിരുന്നു കഴിഞ്ഞ ആഴ്ചയിൽ കേരളത്തിലെ മാധ്യമങ്ങൾ. സമൂഹമാധ്യമങ്ങളിലും ഇത് വലിയ ചർച്ചയായി. പത്തുപേരെ കുത്തിക്കൊന്ന, നിരവധി വീടുകളും കടകളും തകർത്ത അരികൊമ്പനോട് യാതൊരു ദാക്ഷീണ്യവും പാടില്ല എന്ന് പറഞ്ഞവരുണ്ട്. എന്നാൽ രണ്ടാം വയസ്സിൽ അമ്മയെ നഷ്ട്ടപ്പെട്ട അരികൊമ്പൻ എല്ലാവർഷവും അമ്മയുടെ മരണസ്ഥലം സന്ദർശിക്കാൻ എത്തുന്നതിന്റെ കദന കഥ പങ്കുവെച്ച ചിലർ ആനയെ നാടുകടത്തിയതിൽ കുണ്ഠിതരാണ്. തന്നെ ഉപദ്രവിച്ചവരെ മാത്രമേ അരികൊമ്പൻ കൊന്നിട്ടുള്ളു എന്നും മറ്റു നിലയിൽ മരണപ്പെട്ടവരുടെ എണ്ണംകൂടി അരികൊമ്പന്റെ കണക്കിൽ എഴുതിച്ചേർക്കയായിരുന്നു എന്നും പറഞ്ഞവരുണ്ട്. 23 പേരെ കൊന്ന മുതുമല മൂർത്തി എന്ന ഒറ്റയാനും പതിമൂന്നു ജീവൻ എടുത്ത തെച്ചിക്കോട്ടുകാവ് രാമചന്ദ്രൻ എന്ന നാട്ടാനയും ചെയ്ത അത്രയും കൊല അരികൊമ്പൻ നടത്തിയിട്ടില്ലല്ലോ എന്നാണ് ചിലരുടെ പക്ഷം.

ആനകളെ നാടുകടത്തുന്നതിന്റെ പിന്നിൽ കാടു കയ്യേറാൻ കാത്തുനിൽക്കുന്ന ഭൂമാഫിയ സംഘങ്ങളാണ് പ്രവർത്തിക്കുന്നത് എന്നു പറഞ്ഞതു ചിന്നക്കനാൽ 301 കോളനി നിവാസികളാണ്. ഭൂമാഫിയ സംഘങ്ങൾ ആനകളെ പ്രകോപിപ്പിക്കുകയും ഉപദ്രവിക്കുകയും ചെയ്യുന്നതുകൊണ്ടാണ് ആനകൾ അക്രമകാരികൾ ആകുന്നതെന്നും അവർ പറയുന്നു.

ലോകത്തിലെ പലരാജ്യങ്ങളിലും അച്ചടി-ദൃശ്യമാധ്യമങ്ങളെ നീയന്ത്രിക്കുന്നതു മൂലധനശക്തികളും ബഹുരാഷ്ട്ര വ്യാപാര കുത്തകളുമാണ്. ഉദാരവത്കരണത്തിന്റെ ഭാഗമായി ഇന്ത്യയിലേക്കും ഇത്തരം അന്താരാഷ്ട്ര മാധ്യമസ്ഥാപനങ്ങൾ കടന്നുവരികയുണ്ടായി. അതിൽ പ്രധാനികൾ റൂപെർട്ട് മർഡോക്ക് നയിക്കുന്ന സ്ഥാപനങ്ങളും CNN, CNBC മുതലായക്കു പങ്കാളിത്തമുള്ള മാധ്യമ ശൃംഖലകളുമാണ്. ഇവരുടെ വരവോടെയാണ് ഇന്ത്യൻ മാധ്യമരംഗത്തു കച്ചവടമനോഭാവം പ്രത്യക്ഷപ്പെട്ടു തുടങ്ങിയത്. പണവും പരസ്യവും നൽകുന്നവരുടെ താൽപര്യങ്ങൾക്കു വഴങ്ങി വാർത്തകൾ സൃഷ്ടിക്കുകയും തമസ്കരിക്കുകയും ചെയ്യുന്ന രീതിയിലേക്ക് മാധ്യമപ്രവർത്തനം അധഃപതിച്ചു. സമൂഹത്തോടുള്ള പ്രതിബദ്ധത മറന്ന മാധ്യമപ്രവർത്തകൻ ഇന്ന് കേവലം അധികാര കേന്ദ്രങ്ങളുടെ കൂലിഎഴുത്തു തൊഴിലാളിയായി മാറി.

സെക്കുലർ പത്രങ്ങൾ മാത്രമല്ല ആത്മിക ലോകത്തും ഈ അധഃപതനം പ്രതിഫലിക്കുന്നു. അധികാരകേന്ദ്രങ്ങളോട് ചേർന്നുനിന്നു സാമ്പത്തിക നേട്ടം ഉണ്ടാക്കുക എന്ന ലക്ഷ്യത്തോടെ സഭാ നേതാക്കളുടെ ജിഹ്വായായി മാറി പല ക്രിസ്ത്യൻ പ്രസിദ്ധീകരണങ്ങളും. ഇത്തരം കുഴലൂത്തുകാരുടെ ശബ്ദകോലാഹലത്തിനുള്ളിൽ സത്യവും ധർമ്മവും നീതിയും പലപ്പോഴും മുങ്ങിപ്പോകുന്നു. ജനങ്ങളോടുള്ള കടമയും പത്രധർമ്മവും മറന്ന് പ്രധാന വാർത്തകൾ അവർ മുക്കുന്നു; വ്യാജവാർത്തകൾ പടച്ചുവിടുന്നു. പിന്നെ നിലനില്പിനുവേണ്ടിയും പ്രസക്തിക്കുവേണ്ടിയും ഇവർക്ക് ‘അരികൊമ്പ’ന്മാരുടെ പിന്നാലെ പായേണ്ടിവരുന്നു.

ഹാലേലൂയ്യാ പത്രത്തിൽ നിന്ന് നിരന്തരം വാർത്തകൾ നിങ്ങളുടെ മൊബൈലിൽ ലഭിക്കുവാൻ ഇവിടെ ക്ലിക് ചെയ്ത് വാട്സ്ആപ് ഗൂപ്പിൽ ജോയിൻ ചെയ്യുക

ഹാലേലൂയ്യ പത്രത്തിന്റെ വരിക്കാരാകുക. ഒരു വർഷത്തേക്ക് 200 രൂപ. രണ്ടുവർഷത്തെ വരിസംഖ്യ (400 രൂപ) ഒന്നിച്ചു അടക്കുന്നവർക്ക് മനോഹരമായ ഒരു പുസ്തകം സൗജന്യമായി ലഭിക്കും. പുസ്തകം വീട്ടിൽ എത്തിക്കുമ്പോൾ വരിസംഖ്യ അടച്ചാൽ മതി. താൽപ്പര്യമുള്ളവർ നിങ്ങളുടെ പൂർണ്ണ വിലാസം പിൻകോഡ് ഫോൺ നമ്പർ എന്നിവ ഹല്ലേലൂയ എന്ന സന്ദേശത്തോടെ  974 429 4144 എന്ന നമ്പറിലേക്ക് WhatsAap ചെയ്യുക.