hallelujah ll പ്രതിദിന ധ്യാനം

തോംസൺ പത്തനാപുരം

ഒന്നിനാലും വിചാരപ്പെടരുത്

യഹോവയുടെ ആലോചന ശാശ്വതമായും അവൻ്റെ ഹൃദയവിചാരങ്ങൾ തലമുറതലമുറയായും നില്ക്കുന്നു.
സങ്കീര്‍ത്തനങ്ങള്‍ 33:11

നാം പലപ്പോഴും പല പദ്ധതികളും തയ്യാറാക്കുന്നവരാണ്. ഏതുകാര്യം ചെയ്യുമ്പോഴും വ്യക്തമായ ലക്ഷ്യം നമുക്കുണ്ടായിരിക്കണം. വ്യക്തമായ തയ്യാറെടുപ്പുകൾ ഇല്ലാതിരുന്നാൽ മണലിൽ പണുത വീടുപോലെ ഇരിക്കും. എന്നാൽ നമ്മുടെ എല്ലാ സ്വപ്നങ്ങളും സാധ്യമാകണമെന്നില്ല.

ഒരു ടീച്ചർ ആകുക എന്നതായിരുന്നു റിയഎന്ന പെൺകുട്ടിയുടെ ആഗ്രഹം. എന്നാൽ തൻ്റെ ശാരീരിക അവശതകൾ അംഗപരിമിതർക്കായുള്ള സ്പെഷ്യൽ സ്കൂളിൽ ടീച്ചർ ആകുക എന്ന പദ്ധതി ഉപേക്ഷിക്കുവാൻ അവളെ നിർബന്ധിതയാക്കി. അത് അവളെ വളരെയധികം അധികം മാനസികമായി തളർത്തി. തന്നെക്കൊണ്ട് ഇനി ഒന്നിനും കഴിയില്ല എന്ന് വിചാരപെട്ട് അവൾ വല്ലാതെ നിരാശപ്പെട്ടു. എന്നാൽ അവൾ ദൈവത്തിൽ ആശ്രയിക്കുന്നവളും പ്രാർത്ഥിക്കുന്നവളും ആയിരുന്നു. വളരെ പെട്ടന്ന് നിരാശയുടെ തോടുപൊട്ടിച്ച് അവൾ പുറത്തുവന്നു. തന്നെപോലെ നിരാശപ്പെട്ടു തളർന്നു പോകുന്നവരെ ബലപ്പെടുത്തനായി അവൾ എഴുതാൻ തുടങ്ങി.

പിൽക്കാലത്ത് അവളൊരു പ്രശസ്തയായ എഴുത്തുകാരിയായി മാറി. അശരണരായവക്ക് ധൈര്യവും മാനസിക പിന്തുണയും നൽകുന്ന അനേകം പുസ്തകങ്ങളുടെ രചയിതാവായി മാറി. “തിരിഞ്ഞുനോക്കുമ്പോൾ, ദൈവം എൻ്റെ പദ്ധതികൾ മാറ്റിയത് എന്തുകൊണ്ടാണെന്ന് എനിക്ക് മനസ്സിലായി,” അവൾ പറയുന്നു. “ദൈവത്തിന് എന്നെക്കുറിച്ച് ഒരു വലിയ പദ്ധതി ഉണ്ടായിരുന്നു.”

അവൻ്റെ പദ്ധതി തിരിച്ചറിയാതെ നാം വിചാരപെട്ടതുകൊണ്ട് ഒരു പ്രയോജനവുമില്ല. ദൈവത്തിന്നു നമ്മെ കുറിച്ച് ഒരു ഉദ്ദേശമുണ്ട്. നമ്മെക്കുറിച്ച് മാത്രമല്ല നമ്മുടെ തലമുറകളെ കുറിച്ച് പോലും ദൈവം പദ്ധതിയിട്ടിട്ടുണ്ട്. യേശുവിനെ ക്രൂശിക്കുക എന്നത് അവൻ്റെ പദ്ധതിയുടെ ഭാഗമാണ്. കഴിയുമെങ്കിൽ പാനപാത്രം നീക്കണമെന്ന് പുത്രൻ വ്യാകുലപ്പെട്ട് ദൈവീക പദ്ധതിയിൽനിന്ന് പിന്മാറിയാൽ മനുഷ്യവർഗ്ഗത്തിൻ്റെ രക്ഷ സാധ്യമാകില്ല. ക്രൂശ് എന്ന അനുഭവത്തിലൂടെ നമ്മൾ കടന്നുപോയാലേ ഉയിർപ്പ് യാഥാർഥ്യമാകൂ. ആകയാൽ ഒന്നിനെക്കുറിച്ചും വിചാരപ്പെടാതെ ദൈവീക പദ്ധതിക്കായി നമ്മെ സമർപ്പിക്കാം.