Hallelujah-പ്രതിദിന ധ്യാനം-ആകുലം വേണ്ട അരുമ നാഥൻ കൂടെയുണ്ട്

 തോംസൺ പത്തനാപുരം
ആകുലം വേണ്ട അരുമ നാഥൻ കൂടെയുണ്ട്

അവൻ നിങ്ങൾക്കായി കരുതുന്നതാകയാൽ നിങ്ങളുടെ സകല ചിന്താകുലവും അവൻ്റെ മേൽ ഇട്ടുകൊൾവിൻ. 1 പത്രൊസ് 5:7

ചിന്താകുലങ്ങൾ മനുഷ്യസഹജമാണ്. പലവിധത്തിലുള്ള ആകുലതകളിലുടെ ദിനവും നാം കടന്നു പോകുന്നു. നാം ആയിരിക്കുന്ന സ്ഥിതിയിൽ നിന്നും മെച്ചപ്പെട്ട നിലവാരത്തിലേക്ക് എത്തുവാനുള്ള പ്രയത്നത്തിലാണ് എല്ലാവരും. ഒരു കൊച്ചു കുഞ്ഞിന് മുതൽ പ്രായമുള്ളവർക്ക് വരെ ഈ ചിന്താഗതി ഉണ്ട്. അതിനു കഴിയാതെ വരുമ്പോൾ ചിന്താകുലത്താൽ നാം നിറയപ്പെടുന്നു.

ആകുലങ്ങൾ ഇല്ലാത്ത ഒരു ജീവിതം സാധ്യമോ? സാധ്യമാണെന്ന് പ്രകൃതി നമ്മെ പഠിപ്പിക്കുന്നു. ഒറിഗോൺ സ്റ്റേറ്റ് യൂണിവേഴ്‌സിറ്റിയിലെ പക്ഷിശാസ്ത്രജ്ഞനായ ഡാനിയേൽ റോബി പറയുന്നത്, “മാതാപിതാക്കൾ സമയമാകുമ്പോൾ അവരുടെ കുഞ്ഞുങ്ങളെ തനിയെ ജീവിക്കാൻ പ്രേരിപ്പിക്കുന്നു. അവ കുഞ്ഞുങ്ങളെ കൊത്തി ഓടിക്കുകയോ വിട്ടു പിരിയുകയോ ചെയ്യും.”

വാഷിംഗ്ടൺ സർവകലാശാലയിലെ പിഎച്ച്ഡി വിദ്യാർത്ഥിയായ നാസിമ ബൗസിദ് പറയുന്നു (വെസ്റ്റേൺ ഫെൻസ് ലിസാഡിനെ കുറിച്ചാണ് അവർ പഠിക്കുന്നത്), “മിക്ക പല്ലികളും അവയുടെ മുട്ട നിക്ഷേപിക്കുന്നു, മൂടുന്നു, ഉടനടി അത് ഉപേക്ഷിച്ച് നീങ്ങുന്നു.” മുട്ടകൾ “അസുഖകരവും വിചിത്രവുമായ ഒരു വസ്തുമാത്രം” ആണെന്ന് അവ കരുതുന്നു. ഒരുതരത്തിലുമുള്ള രക്ഷാകർതൃ പരിചരണം അവയ്ക്കു ലഭിക്കുന്നില്ല. “അതിനെക്കുറിച്ച് വീണ്ടും അവ ചിന്തിക്കുന്നില്ല.”

ആരുടേയും കരുതൽ ലഭിക്കുന്നില്ലെങ്കിലും എത്രയോ അത്ഭുതകരമായി പ്രകൃതിയിൽ ഉള്ള ജീവജാലങ്ങൾ പോഷിപ്പിക്കപ്പെടുന്നു. അവയെല്ലാം തനിയെ ജീവിതചക്രം മുന്നോട്ടു നയിക്കുന്നു. ദൈവം എത്രയോ അത്ഭുതകരമായി സകല സൃഷ്ടിയേയും പരിപാലിക്കുന്നു. കരയുന്ന കാക്ക കുഞ്ഞിനും അതത്തിൻ്റെ ആഹാരം നൽകി അവൻ അവയെ പോറ്റുന്നു.

സകല ജീവജാലങ്ങൾക്കും അധികാരിയായി സൃഷ്ടിക്കപ്പെട്ട നമ്മെ എത്രയോ അധികമായി കരുതുവാൻ ദൈവം ശക്തനാണ്. നമ്മുടെ ബൗദ്ധികവും ആത്മീയവുമായ വളർച്ചയ്ക്ക് ആവശ്യമുള്ളതെല്ലാം അവൻ കഴിഞ്ഞ നാളുകളിൽ നൽകിയില്ലേ. ഇന്ന് നമ്മെ അലട്ടുന്ന എല്ലാ പ്രതിസന്ധികളെയും തരണം ചെയ്യുവാൻ അവൻ നമ്മേ സഹായിക്കും. അവൻ സകലവും നന്മയ്ക്കായി ചെയ്യുന്നു. അവൻ അറിയാതെ ഒന്നും സംഭവിക്കുന്നില്ല. എല്ലാത്തിനും അവന് ഒരു ഉദ്ദേശമുണ്ട്. ആകയാൽ ആകുലപ്പെടാതെ അരുമ നാഥനിൽ പൂർണമായി ആശ്രയിക്കാം.