ധ്യാനം: ഒളിച്ചിരുന്നവനെ തെളിച്ചെടുത്ത വാക്കുകൾ

“സക്കായിയേ, വേഗം ഇറങ്ങിവാ; ഞാൻ ഇന്നു നിൻ്റെ വീട്ടിൽ പാർക്കേണ്ടതാകുന്നു” എന്നു അവനോടു പറഞ്ഞു.(ലൂക്കോസ് 19:5)

ചാർത്തിക്കിട്ടിയ വിശേഷണങ്ങൾ ഒക്കെയും സക്കായിയുടെ ജീവിതചര്യയ്ക്ക് യോജിച്ചവയായിരുന്നു. എങ്കിലും ചുങ്കക്കാരൻ, നികൃഷ്ടൻ,മാന്യന്മാർ കൂട്ട് കൂടാൻ ഇഷ്ട്ടപ്പെടാത്ത ജോലി, ശാരീരികമായി ബലഹീനൻ, ആളിൽ കുറിയ മനുഷ്യൻ തുടങ്ങിയ വിശേഷണങ്ങളൊക്കെ അവനെ മോശക്കാരനാക്കി തീർക്കുന്നവയാണ്.

എങ്കിലും കേട്ടറിവും മനസ്സിൽ ഇട്ട് കൊണ്ട് മുള്ള് നിറഞ്ഞ കാട്ടത്തിയിൽ വലിഞ്ഞു കയറുമ്പോൾ സക്കായിയ്ക്ക് ഒറ്റ ആഗ്രഹമേ ഉണ്ടായിരുന്നുള്ളൂ. യേശുവിനെ ഒന്ന് കാണണം.
കാണാൻ കൊതിച്ചവൻ്റെ വ്യക്‌തിപരമായ അയോഗ്യതകൾ ശ്രദ്ധിക്കാതെ അവൻ്റെ മനോഭാവം മനസ്സിലാക്കിയ ക്രിസ്തു മരച്ചുവട്ടിൽ നിൽക്കുകയാണ്. അവിടുത്തെ സ്നേഹം കൊണ്ട് മുകളിലേക്ക് നോക്കി വിളിക്കുന്ന ആ ഇമ്പസ്വരം സക്കായിയുടെ കാതിൽ മുഴങ്ങി.
“സക്കായിയെ ഇറങ്ങി വാ”

പലരും ഒളിഞ്ഞും തെളിഞ്ഞും തന്നെ പലതും വിളിക്കുമ്പോൾ പേര് ചൊല്ലി വിളിച്ച നാഥൻ്റെ സ്നേഹം അവൻ്റെ കണ്ണുകളിൽ തിളക്കം നൽകുകയാണ്.
ആ ഒറ്റ വിളിയിൽ സക്കായിയുടെ സ്റ്റാറ്റസ് മാറി. അവൻ ചതിവായി വാങ്ങിയതെല്ലാം തിരികെ കൊടുക്കാൻ തീരുമാനിച്ചു.മാനസാന്തരപ്പെട്ട് ക്രിസ്തു ശിഷ്യനായി മാറ്റപ്പെട്ടു.

അനേക സക്കായിമാർ യേശുവിനായ് കാത്തിരിക്കുന്നുണ്ട്. നമ്മുടെ സ്നേഹത്തിൻ്റെ, കരുണയുടെ, അംഗീകാരത്തിൻ്റെ ഒരു വിളിയും കാതോർത്ത്. ആരെയും വ്യക്തിപരമായ കാരണങ്ങളാൽ, തള്ളിക്കളയാതെ ചേർത്ത് പിടിക്കാം.സമൂഹം തള്ളിക്കളയുന്നവരെ പേര് ചൊല്ലി വിളിക്കാൻ ക്രിസ്തു സ്നേഹത്തിൻ്റെ ഭാവത്തിലേക്ക് ആനയിക്കാൻ നമുക്ക് ഈ പ്രഭാതത്തിൽ തീരുമാനം എടുക്കാം…