Hallelujah-പ്രതിദിന ധ്യാനം-ഭയപ്പെടേണ്ട, വിശ്വസിക്ക മാത്രം ചെയ്ക

 ഗ്രേസ് തോമസ് കുമ്പനാട്

യേശു ആ വാക്കു കാര്യമാക്കാതെ പള്ളിപ്രമാണിയോട്: ഭയപ്പെടേണ്ട, വിശ്വസിക്ക മാത്രം ചെയ്ക എന്ന് പറഞ്ഞു.

താൻ ഏറെ സ്നേഹിക്കുന്ന കുഞ്ഞു മകളുടെ രോഗസൗഖ്യത്തിനു വേണ്ടി യേശുവിൻ്റെ അടുക്കൽ എത്തിയ യായിറോസ് എന്ന പള്ളിപ്രമാണി. യേശു അവൻ്റെ അപേക്ഷ കേട്ട് അവനോടൊപ്പം യാത്ര ആരംഭിക്കുന്നു. വലിയ പ്രതീക്ഷയോടെയാണ് യായിറോസ് യേശുവിനേയും കൂട്ടി വീട്ടിലേക്ക് പോകുന്നത്. പക്ഷെ അപ്രതീക്ഷിതമായി കാര്യങ്ങൾ തകിടം മറിഞ്ഞു. കുഞ്ഞ് മരിച്ചു പോയി എന്ന വാർത്തയുമായി വീട്ടിൽ നിന്ന് ആൾ വന്നു.

എല്ലാ പ്രതീക്ഷയുമറ്റ് തകർന്നു നിൽക്കുന്ന ആ മനുഷ്യനോട് യേശു ശാന്തമായി പറയുന്നു ” ഭയപ്പെടേണ്ട, വിശ്വസിക്ക മാത്രം ചെയ്യുക ” ഇന്നും എല്ലാ പ്രതീക്ഷയും തകർന്ന് നിരാശയുടെ പടുകുഴിയിലേക്ക് വീണുപോയവരോട് യേശുവിന് പറയുവാനുള്ളത് ഇതേ വാചകമാണ്. ഭയപ്പെടേണ്ട ! വിശ്വസിക്കുക മാത്രം ചെയ്യുക!

യേശുവിൻ്റെ സുവിശേഷത്തിൻ്റെ കാതൽ ഇതാണ്. പാപത്തിലും മരണഭയത്തിലും അകപ്പെട്ടു പോയ മനുഷ്യനോട് യേശു പറയുന്നു. ഭയപ്പെടേണ്ട, വിശ്വസിക്ക മാത്രം ചെയ്ക.

മനുഷ്യൻ പല വിധ ഭയങ്ങൾക്ക് അടിമയാണ്. നാളത്തെ ജീവിതത്തെ നേരിടാനുള്ള ഭയമാണ് ചിലരെ ആത്മഹത്യയിലേക്ക് നയിക്കുന്നത്. അടിസ്ഥാനപരമായി പാപമാണ് എല്ലാ ഭയത്തിൻ്റെയും കാരണം. നമ്മുടെ പാപങ്ങൾ എത്രമാത്രം കഠിനമാണങ്കിലും ക്രിസ്തുവിൻ്റെ രക്തത്തിന് ആ കറകൾ കഴുകുവാൻ കരുത്തുണ്ട്. പാപത്തിൻ്റെയും കുറ്റബോധത്തിൻ്റെയും ഭയത്തിൻ്റെയും തടവറയിൽ നിന്ന് പുറത്തു കടക്കുവാൻ വിശ്വാസം എന്ന ഒറ്റ വാതിൽ മാത്രമേ ഉള്ളു.
ഭയപ്പെടേണ്ട ! വിശ്വസിക്കുക മാത്രം ചെയ്യുക!

നിങ്ങൾ പലവിധ പരീക്ഷകളാൽ തളർന്നിരിക്കുന്നുവോ? അടുത്ത ചുവട് എവിടെ, എങ്ങനെ വെക്കണമെന്നറിയാതെ കുഴയുന്നുവോ? മുങ്ങിപ്പോകുന്നു എന്ന് തോന്നുന്നുവോ? ഭയപ്പെടേണ്ട യേശു അരികിലുണ്ട്. അവനിൽ വിശ്വസിക്കുക. ഭയത്തെ പുറത്താക്കുക