പ്രതിദിന ധ്യാനം-നുകങ്ങൾ തകർക്കപ്പെടുവാനുള്ളതാണ്

അന്നാളിൽ അവൻ്റെ ചുമടു നിൻ്റെ തോളിൽനിന്നും അവൻ്റെ നുകം നിൻ്റെ കഴുത്തിൽനിന്നും നീങ്ങിപ്പോകും; പുഷ്‍ടിനിമിത്തം നുകം തകർന്നുപോകും.
യെശയ്യാവ് 10:27

നുകം അടിമത്വത്തെ കാണിക്കുന്നതാണ്. നുകം തോളിൽ ഇരിക്കുന്നിടത്തോളം കാളക്ക് സ്വാതന്ത്ര്യമില്ല, അവകാശങ്ങളില്ല. യിസ്രായേൽ പലപ്പോഴും ശത്രുരാജ്യങ്ങളുടെ അടിമ നുകത്തിൻ കീഴിലായിരുന്നു. യെശയ്യാവ് ഈ വാക്യം എഴുതുമ്പോൾ യിസ്രായേൽ ജനതയെ അടിമയാക്കായിരിക്കുന്ന അശൂരിൻ്റെ നുകത്തെ തകർത്ത് ഒരു ശേഷിപ്പിനെ പുനർജീവിപ്പിക്കുന്ന പ്രത്യാശയുടെ സന്ദേശമാണ് പ്രവാചകൻ നൽകുന്നത്.

പുഷ്ടി നിമിത്തം നുകം തകരും. ഇന്ന് പലവിധ നുകങ്ങൾ പേറിക്കൊണ്ടാണ് ജീവിതം. പാവം, രോഗം, അസമാധാനം, ഭയം, ടെൻഷൻ,, ബാധ്യതകൾ… ഇങ്ങനെ എണ്ണിയാൽ ഒടുണ്ടാത്ത ഭാരമേറിയ തുകങ്ങൾ. ശത്രു കാലാകാലങ്ങളിൽ എടുത്തു വച്ച നുകത്തിൻ്റെ ഭാരവുമായുള്ള ജീവിതം അവസാനിക്കാൻ സമയമായി.

പത്രോസിൻ്റെ വലിയ പ്രശ്നം ഭീരുത്വത്തിൻ്റെ നുകമായിരുന്നു. കർത്താവിൻ്റെ കൂടെ നടന്നപ്പോഴും അവനാ നുകവുമായായാണ് നടന്നിരുന്നത്. അതു കൊണ്ടാണവൻ വാളുമായി നടന്നത്. വേലക്കാരി സ്ത്രീയുടെ മുന്നിൽ പതറിയതും ഭീരുത്വ നുകം പിടലിക്ക് ഇരുന്നതുകൊണ്ടാണ്. ഒരു രാത്രി പഴയ തൊഴിലുമായി ഗലീല കടലിലേക്ക് പോയതും ഇതേ ഭീരുത്വത്താലാണ്.

പക്ഷെ; അഭിഷേകം അവൻ്റെ ഭീരുത്വം മാറ്റി, അഭിഷേകത്തിൻ്റെ പുഷ്ടിയാൽ അവൻ്റെ നുകം തകർന്നു. ഒരു വേലക്കാരിയുടെ മുന്നിൽ മുട്ടിടിച്ചവൻ ഇപ്പോൾ ആയിരങ്ങളുടെ മുന്നിൽ സഭാ കമ്പമില്ലാതെ പ്രസംഗിക്കുന്നു. അമർച്ചയായി കൽപ്പിച്ച മഹാപുരോഹിതൻ്റെ മുന്നിൽ പോലും ചങ്കുവിരിച്ച് മനുഷ്യരെക്കാൾ ദൈവത്തെ അനുസരിക്കേണ്ടതാകുന്നു എന്ന മറുപടി പറയണമെങ്കിൽ നുകം തകർക്കുന്ന അഭിഷേകം വേണം.
അഭിഷേകത്തിൻ്റെ പുഷ്ടി പ്രാപിച്ചാൽ നുകങ്ങൾ തകർക്കപ്പടും. അതേ നുകങ്ങൾ തകർക്കപ്പെടുവാനുള്ളതാണ്.