പ്രതിദിന ധ്യാനം-ഉള്ളു പൊള്ളയായ അവകാശവാദങ്ങൾ

സാംകുട്ടി ചാക്കോ നിലമ്പൂർ

പത്രോസ് അവനോട് : ഞങ്ങൾ സകലവും വിട്ട് നിന്നെ അനുഗമിച്ചുവല്ലോ; ഞങ്ങൾക്ക് എന്തു കിട്ടും എന്ന് ചോദിച്ചു.
മത്തായി 19:27

സമ്പത്ത് സ്വർഗരാജ്യ പ്രവേശനത്തിന് തടസമായ ഒരു ചെറുപ്പക്കാരൻ്റെ ദുഃഖം കണ്ട് വേദനിച്ച യേശു തൻ്റെ ശിഷ്യന്മാരോട് ഉള്ളം തുറന്ന് സംസാരിക്കുന്ന ഭാഗമാണിത്. ധനവാൻ സ്വർഗരാജ്യത്തിൽ പ്രവേശിക്കുന്നത് ഒട്ടകം സൂചി കുഴയിലൂടെ കടക്കുന്നത്ര വിഷമകരമാണ്.
അത്രയും പറഞ്ഞപ്പോഴാണ് പത്രോസിൻ്റെ ചോദ്യം. സകലവും വിട്ടു വന്ന ഞങ്ങൾക്ക് എന്ത് കിട്ടും?

പത്രോസ് അൽപ്പം മുൻപ് ദു:ഖിച്ച് മടങ്ങിയ ധനിക യുവാവുമായി തന്നെയൊന്ന് താരതമ്യപ്പെടുത്തി നടത്തിയ അവകാശവാദമാണിത്. ഞാൻ പടക് ഉപേക്ഷിച്ചു, വല ഉപേക്ഷിച്ചു, മീൻ ബിസിനസ് വിട്ടു…

സത്യത്തിൽ പത്രോസിൻ്റെ ഈ അവകാശവാദമൊന്നും ശരിയല്ലായിരുന്നു. അവൻ യേശുവിനെ അനുഗമിക്കാൻ പോരുമ്പോൾ തൻ്റെ പടകും വലയും ഏത് നിമിഷവും തിരിച്ചെടുക്കത്തക്കവിധം സുരക്ഷിത സ്ഥാനത്ത് എത്തിച്ച ശേഷമായിരിക്കാം അവൻ ശിഷ്യനായത്. വീണ്ടും ഇടക്കിടെ വീട്ടിൽ പോയി പടകും വലയും സുരക്ഷിതമാണന്ന് ഉറപ്പാക്കിയും കാണും. അതുകൊണ്ടാണല്ലോ യേശുവിൻ്റെ ക്രൂശീകരണ ശേഷം സഹ ശിഷ്യന്മാരെയും വിളിച്ച് മീൻപിടിക്കാൻ പത്രോസ് ഇറങ്ങിത്തിരിച്ചത്.

നാമും ഉപേക്ഷിച്ചെന്ന് പറയുന്ന പലതും യഥാർത്ഥത്തിൽ ഏതെങ്കിലും അവസരങ്ങളിൽ തിരിച്ചെടുക്കാനായി സൂക്ഷിച്ച് വച്ചിട്ടുണ്ടോ? പക, പിണക്കം, ചില ഇഷ്ടങ്ങൾ, താൽപ്പര്യങ്ങൾ അങ്ങനെ എന്തുമാകാം. സ്വയപരിശോധന നടത്തുവാൻ തയ്യാറാണോ?

നമ്മുടെ അവകാശവാദങ്ങൾ പൊള്ളയായവയാണങ്കിൽ ഒരിക്കൽ അത് വെളിപ്പെടും.
പത്രോസ് രാത്രി മുഴുവൻ അധ്വാനിച്ച് ഒന്നും കിട്ടാതെ നിരാശയോടെ വന്ന് ഒടുവിൽ കരയിൽ നിന്നവൻ്റെ വാക്കു കേട്ട് വല വീശി. വൻ മിൻ കൂട്ടം കിട്ടി. ആ നിമിഷം പത്രോസ് കർത്താവിനെ തിരിച്ചറിഞ്ഞു. അവിടെ ഒരു മുക്കുവനും ചെയ്യാത്ത പ്രവർത്തി പത്രോസ് ചെയ്തു. മീൻ നിറഞ്ഞ പടക് ഉപേക്ഷിച്ച് ഉടുവസ്ത്രം പോലും ഇല്ലാതെ അവൻ യേശുവിനരികിലേക്കെത്തി. സത്യത്തിൽ ആ സമയത്തല്ലേ പത്രോസ് എല്ലാം ഉപേക്ഷിച്ചത്.