പ്രതിദിന ധ്യാനം I മുഖം മൂടികൾ I മിനി എം തോമസ്

അങ്ങനെ തന്നേ പുറമെ നിങ്ങൾ നീതിമാന്മാർ എന്നു മനുഷ്യർക്കു തോന്നുന്നു; അകമെയോ കപടഭക്തിയും അധർമ്മവും നിറഞ്ഞവരത്രേ. (മത്തായി 23:28)

മുഖം മൂടികൾ കൊണ്ട് ചുറ്റപ്പെട്ട ലോകത്താണ് നമ്മളിന്ന് ജീവിക്കുന്നത്. ആത്മീയനെന്നോ അനാത്മീയാനെന്നോ ധനവാനെന്നോ ദരിദ്രനെന്നോ തൊഴിലാളിയെന്നോ മുതലാളിയെന്നോ ഒരു വ്യത്യാസമില്ലാതെ മുഖംമൂടികൾ അണിഞ്ഞ് മാത്രം ജീവിക്കുവാൻ കഴിയുന്ന ഒരു കാലത്തേക്ക് എത്ര വേഗമാണ് നമ്മൾ എത്തപ്പെട്ടത്!

പക്ഷെ, ഈ മുഖമൂടികൾക്കുള്ളിലും ആത്മീയതയുടെ മുഖമൂടികൾ അണിയുന്നവർ യേശു ജീവിച്ച കാലഘട്ടത്തിലും കുറവായിരുന്നില്ല. ശാസ്ത്രിമാരും, പരീശന്മാരും ബാഹ്യമായ ആത്മീയ പ്രവർത്തികളും ആചാരാനുഷ്‌ഠാനങ്ങളുംകൊണ്ട് തങ്ങൾ നീതിമാന്മാർ എന്ന് വരുത്തി തീർക്കാൻ നന്നേ പരിശ്രമിച്ചിരുന്നു. പക്ഷെ, അവരുടെ ഹൃദയത്തിൽ കപടഭക്തിയും അധർമവും നിറഞ്ഞിരുന്നു.

പിതാക്കന്മാർ എഴുതിവെച്ച ആചാരങ്ങളും ആരാധന രീതികളും കൃത്യമായി നമ്മുടെ സഭകളിൽ പാലിക്കപ്പെടുമ്പോൾ, ഭക്തിയും സ്നേഹവും വിശ്വാസവും അവിടെ സ്ഥാനം അർഹിക്കുന്നുവോ?വീടിനെയും നാടിനെയുംപ്പറ്റി ചിന്തിക്കാതെ നമ്മുടെ കൂട്ടായ്മകളിൽ പൂർണമായി ശ്രദ്ധ കേന്ദ്രീകരിക്കാൻ നമുക്ക് കഴിയണം. എന്നാൽ മാത്രമേ പൂർണഹൃദയത്തോടെയും പൂർണമനസ്സോടെയും കർത്താവിനെ ആരാധിച്ചു എന്ന് സംതൃപ്തിയോടെ പറയാൻ നമുക്ക് സാധിക്കൂ.

നമ്മുടെ പ്രാർത്ഥനകൾ ആത്മാർത്ഥമാണോ?
നമ്മുടെ ഭക്തി ഹൃദയത്തിൽനിന്നാണോ?
നമ്മുടെ ആരാധനകൾ പൂർണ ഹൃദയത്തോടെയാണോ?
നമുക്കൊന്ന് പുനഃപപരിശോധന നടത്താം.

ഇന്ന് പടർന്നുപിടിച്ചുകൊണ്ടിരിക്കുന്ന പകർച്ചവ്യാധികളെ അതിജീവിക്കാൻ മുഖംമൂടികൾ അത്യാവശ്യമാണ്. പക്ഷെ, ആത്മീയതയുടെ മുഖംമൂടികൾ നാം വലിച്ചെറിയണം. ഹൃദയങ്ങളെ പരിശോധിക്കുന്ന ദൈവം സകലവും അറിയുന്നുണ്ട് എന്ന ബോധ്യം നമുക്കുണ്ടാവണം.