പ്രതിദിന ധ്യാനം-പ്രലോഭനത്തെ അതിജീവിച്ചാൽ

ജസ്റ്റിൻ കായംകുളം

എന്നാൽ യഹോവ ജോസഫിനോട് കൂടെ ഇരുന്നു
ഉല്പത്തി 39:21

വാഗ്‌ദത്തങ്ങളിലേക്കു എത്തുവാൻ സമയം ഏറ്റവും അടുത്ത സമയത്താണ് പോത്തിഫറിൻ്റെ ഭാര്യ യോസേഫിനെ കുടുക്കുവാൻ കച്ച കെട്ടിയിറങ്ങിയത്. വേണമെങ്കിൽ യോസേഫിനു  താൽക്കാലിക സുഖത്തിനു പിന്നാലെ പോകാമായിരുന്നു. ആരും അറിയുകയുമില്ല. എന്നാൽ പുറമെയുള്ള വിശുദ്ധിയേക്കാൾ തൻ്റെ ശരീരത്തെ ജീവനും വിശുദ്ധിയുമുള്ള യാഗമായി സമർപ്പിച്ച ഭക്തൻ പ്രലോഭനത്തെ അതിജീവിച്ചു..

തൻ്റെ വിശുദ്ധി കാത്തു സൂക്ഷിക്കാനുള്ള ശ്രമത്തിനിടയിൽ അല്പകാലം കാരാഗ്രഹത്തിൻ്റെ ഇരുട്ടറയിൽ കിടക്കേണ്ടി വന്നെങ്കിലും സമയം ആയപ്പോൾ അവനെ ദൈവം ഉയർത്തി. ദേശത്തിൻ്റെ മേലധികാരിയാക്കി. മുദ്രമോതിരം കൊടുത്തു. വിലയേറിയ വസ്ത്രം, സ്വർണസരപ്പളി എന്നിവ ധരിപ്പിച്ചു. ദേശക്കാർ അവനെ നമസ്ക്കരിച്ചു.

നമ്മുടെ ജീവിതത്തിൽ വിശുദ്ധിയും വേർപാടും കാത്തു സൂക്ഷിച്ചാൽ അല്പകാലത്തേക്കു നാം നിന്ദിക്കപ്പെട്ടാലും, ഇരുട്ടറയിൽ തള്ളപ്പെട്ടാലും ദൈവത്താലുള്ള വാഗ്‌ദത്തങ്ങൾ പാലിക്കപ്പെടുന്ന ഒരുദിവസമുണ്ട്.

നമ്മെ പരിശോധിക്കുന്ന സാഹചര്യങ്ങളിൽ ധൈര്യത്തോടെ നില കൊള്ളാനുള്ള ആർജവത്വം കാണിക്കാൻ ഓരോ ഭക്തരും തയ്യാറാകണം. സാമ്പത്തികത്തിൻ്റെയോ, പദവിയുടെയോ, ജഡ മോഹത്തിൻ്റെയോ മുൻപിൽ തോൽക്കാതിരിക്കുന്നതായിരിക്കട്ടെ നമ്മുടെ വിജയം..

കാലം കഴിയുമ്പോൾ ദൈവീക അനുഗ്രഹം നിശ്ചയമായും നമ്മെ തേടിയെത്തും.
ദൈവം ഏവരെയും അനുഗ്രഹിക്കട്ടെ.