പ്രതിദിന ധ്യാനം – ബലഹീനതയിൽ നിറയുന്ന ശക്തി

ഗ്രേസ് തോമസ് കുമ്പനാട് 
എന്നെ ശക്തനാക്കുന്നവൻ മുഖാന്തരം ഞാൻ സകലത്തിന്നും മതിയാകുന്നു (ഫിലി.4.13).

ആർക്കാണ് ശക്തി ആവശ്യമായിരിക്കുന്നത്?. ബലഹീനർക്ക്, ക്ഷീണിതർക്ക്, വീണുപോയവർക്ക്, അധികാരം കുറഞ്ഞവർക്ക് ഒക്കെ ശക്തി ആവശ്യമാണ്. ഒരുകാലത്ത് അധികാരവും, അറിവും,സമ്പത്തും ഒക്കെകൊണ്ട് അതിശക്തനായിരുന്ന പൗലോസ് ശരീരത്തിൽ ശൂലം വന്നപ്പോൾ (ഒരു പക്ഷെ അത് അവൻ്റെ ശക്തി ക്ഷയിപ്പിക്കുന്ന രോഗമായിരിക്കാം) ഉരുവിട്ട വാക്കുകളാണിത്. എന്നെ ശക്തനാക്കുന്നവൻ മുഖാന്തരം ഞാൻ സകലത്തിന്നും മതിയാകുന്നു

തനിക്ക് ബലഹീനതകൾ ഉള്ളപ്പോഴും തൻ്റെ മേൽ വ്യാപരിച്ചിരുന്ന ശക്തിയുടെ അളവറ്റ വലിപ്പം അദ്ദേഹത്തെ ശക്തിപ്പെടുത്തികൊണ്ടിരുന്നു ശാരീരിക രോഗത്തിൽ വിടുതലിനായി പ്രാർത്ഥിച്ചപ്പോൾ കിട്ടിയ മറുപടി എൻ്റെ കൃപ നിനക്ക് മതി എൻ്റെ ശക്തി ബലഹീനതയിൽ തികഞ്ഞു വരുന്നു എന്നാണ്. ക്രിസ്തു തൻ്റെമേൽ പകർന്ന ശക്തിയിൽ തൻ്റെ എല്ലാ ബലഹീനതകളും ബുദ്ധിമുട്ടുകളും തനിക്ക് സഹിപ്പാൻ കഴിഞ്ഞു.

ശാരീരികവും മാനസികവും ആത്മീയവുമായ ഏത് ബലഹീനതകളിലും വിശ്വാസത്താൽ ശക്തി പ്രാപിക്കുവാൻ കഴിയും. മാനുഷികശക്തിയുടെ വലിപ്പത്തിലോ സൈന്യ ബഹുത്വത്തിലോ അല്ല നമ്മുടെ വിജയം. പിന്നെയോ ദൈവാത്മാവിൻ്റെ അത്യന്ത ശക്തിയിലാണ്. ” സൈന്യത്താൽ അല്ല ശക്തിയാലും അല്ല എൻ്റെ ആത്മാവിനാൽ അത്രേ എന്ന് സൈന്യങ്ങളുടെ യഹോവ അരുളിച്ചെയ്യുന്നു”. (സെഖ 4.6) തകർന്ന ജീവിതങ്ങൾ പണിയപെടുവാൻ ഉടഞ്ഞ ബന്ധങ്ങൾ പുതുക്കപെടാൻ എല്ലാം ദൈവശക്തി വ്യാപാരിക്കപെടുന്നു. ആകയാൽ ആത്മാവിൻ ശക്തിയോടെ ജീവിപ്പാൻ ആത്മനൽവരങ്ങൾ ദിനംതോറും പ്രാപിപ്പാൻ നാം ഉത്സാഹിക്കേണം.

ശിംശോൻ്റെ ശക്തിയുടെ രഹസ്യം ഫെലിസ്ത്യർ ദലീലയിൽ കൂടി മനസ്സിലാക്കി. ശത്രുക്കൾ അദ്ദേഹത്തെ ഒതുക്കി. എന്നാൽ നമ്മുടെ ശക്തിയുടെ രഹസ്യം ദൈവവുമായുള്ള ദൃഡ ബന്ധം ആണ് എന്ന് നമുക്ക് പറയുവാൻ കഴിയണം. ആ ദൈവീക ബന്ധത്തിൽനിന്നും മാറിപ്പോയാൽ ശിംശോൻ്റെ കാര്യത്തിലെന്നപോലെ നമ്മുടെയും ശക്തി ക്ഷയിക്കും.

” യഹോവയെ കാത്തിരിക്കുന്നവർ ശക്തിയെ പുതുക്കും” അങ്ങനെയുള്ളവർ കഴുകന്മാരെപ്പോലെ ചിറകടിച്ചുയരും. ഓടുമ്പോൾ തളർന്നു പോവുകയില്ല.നടക്കുമ്പോൾ ക്ഷീണിച്ചു പോകുകയുമില്ല.യാക്കോബിൻ വല്ലഭൻ്റെ ഭൂജം താങ്ങി ബലപ്പെടുത്തുന്നതാണ്.

ദൈവവചനം വായിക്കുന്നതിലൂടെയും കേൾക്കുന്നതിലൂടെയും അനുസരിക്കുന്നതിനാലും നമുക്ക് ദൈവ ശക്തി ലഭിക്കുന്നു. “അവൻ്റെ വചനം അനുഷ്ഠിക്കുന്നവർ ശക്തിയുള്ളവർ തന്നെ” എന്ന് യോവേൽ പ്രവചനത്തിൽ പറയുന്നു. ആകയാൽ ബലഹീനതയിൽ നമ്മെ ശക്തീകരിക്കുന്ന ദൈവശക്തി നമ്മിൽ നിറയട്ടെ. അങ്ങനെ പാപത്തിൻ മേൽ ശത്രുവിൻമേൽ നമുക്ക് വിജയം പ്രാപിക്കാം.