hallelujah-പ്രതിദിന ധ്യാനം-ശിക്ഷിക്കുന്ന സ്നേഹം

തോംസൺ പത്തനാപുരം

ശിക്ഷിക്കുന്ന സ്നേഹം

അപ്പൻ ഇഷ്ടപുത്രനോട് ചെയ്യുന്നതുപോലെ യഹോവ താൻ സ്നേഹിക്കുന്നവനെ ശിക്ഷിക്കുന്നു.

സദൃശവാക്യങ്ങൾ 3:12

പാരന്റിംഗ് രംഗത്ത് മൃഗങ്ങൾക്കിടയിൽ പിതാവിന് അധികം സ്നേഹം ലഭിക്കാറില്ല. ധ്രുവക്കരടി കുഞ്ഞുങ്ങൾ തങ്ങളുടെ പിതാവുമായി കെട്ടിപ്പിടിക്കുന്നതോ, പിതാവിൻ്റെ പൊങ്ങിക്കിടക്കുന്ന വയറ്റിൽ നിന്നും ഒരു ഔട്ടർ കുഞ്ഞ് ഒളിച്ചുനോക്കുന്നതോ കാണാനാകില്ല. പല മൃഗ ജാലങ്ങളും സന്തതികൾക്ക് അവരുടെ ജീനുകൾ നൽകുന്നതല്ലാതെ കൂടുതലൊന്നും സംഭാവന നൽകുന്നില്ല. ചില സ്പീഷിസുകളിൽ, പുരുഷന്മാരുടെ പ്രവർത്തനങ്ങൾ പിതൃത്വത്തിൽ നിന്ന് വളരെ അകലെയാണെന്ന് തോന്നാം: ലെമറുകൾ, സിംഹങ്ങൾ, ഗ്രിസ്ലി കരടികൾ എന്നിവ ചിലപ്പോൾ സ്വന്തം കുഞ്ഞുങ്ങളെ കൊല്ലുന്നു.

മനുഷ്യർക്കിടയിൽ ഇത് വ്യത്യസ്തമാണ്. മാതാപിതാക്കളുടെ സംരക്ഷണയിൽ വളരുന്ന കുട്ടികൾ സാധാരണയായി അവരുടെ സ്നേഹലാളനകളും ശിക്ഷകളും അനുഭവിച്ചാണ് വളരുന്നത്. ശിക്ഷണങ്ങൾ ലഭിക്കാത്ത പലർക്കും രക്ഷകർത്താക്കളിൽനിന്നോ അധ്യാപകരിൽനിന്നോ അല്ലെങ്കിൽ കുറഞ്ഞപക്ഷം സമൂഹത്തിൽ നിന്നെങ്കിലും പരിലാളനങ്ങൾ ലഭിച്ചിട്ടുണ്ടാക്കും.

ദൈവവചനത്തിൽ ദൈവത്തിന് നമ്മോടുള്ള കരുത്തലിനെ സൂചിപ്പിക്കുവാൻ അപ്പൻ പുത്രൻ എന്ന ബന്ധത്തെ ഉദാഹരണമായി എടുത്തിരിക്കുന്നു. ഏറ്റവും ഇഷ്ടപ്പെട്ട മകനെ അപ്പൻ സ്നേഹക്കൂടുതൽ കൊണ്ട് ശിക്ഷിച്ചു വളർത്തുന്നതിനെ യഹോവയ്ക്ക് നമ്മോടുള്ള ബന്ധത്തെ വിവരിക്കുവാൻ ഉപയോഗിച്ചിരിക്കുന്നു.

പുറംപൂച്ച് കാണിക്കുന്ന സ്നേഹത്തേക്കാൾ അധികം നമ്മുടെ വളർച്ചയ്ക്ക് നിദാന്തം ആകുന്നത് സ്നേഹത്താൽ ഉളവാകുന്ന ശിക്ഷണങ്ങൾ ആണ്. മൃഗങ്ങളിൽ ചില സ്പീഷിസുകളിൽ കണ്ടുവരുന്നതുപോലെ ഒരിക്കലും അത് നമ്മെ ഇല്ലായ്മചെയ്യുവാനല്ല. നേരെമറിച്ച് അത് നമ്മെ വളർച്ചയിലേക്ക് നയിക്കുന്നു. ശിക്ഷണങ്ങൾ വേദനാജനകം ആണെങ്കിലും അത് നമ്മുടെ നന്മയ്ക്ക് ആണെന്ന് നാം മനസ്സിലാക്കണം.

നമ്മോടുള്ള സ്നേഹത്താൽ ഏകജാതനായ പുത്രനെ നൽകിയ ദൈവസ്നേഹത്തെ തിരിച്ചറിയാം. വീഴ്ചകളും താഴ്ചകളും വരുമ്പോഴും കൈവിടാത്ത പിതാവായി അവൻ നമ്മോടുകൂടെയുണ്ട്. ശിക്ഷിക്കുന്ന സ്നേഹത്തെ ഓർത്ത് നന്ദിയുള്ളവരായിരി ജീവിക്കാം. ശിക്ഷകൾ നിരസിക്കാതെ നിത്യതക്കായി ഒരുങ്ങാം.