Hallelujah-പ്രതിദിന ധ്യാനം -സമ്പൂർണരാകാം ദൈവഹിതം ചെയ്യാം

Oct 08, 2020

തോംസൺ പത്തനാപുരം

സമ്പൂർണരാകാം ദൈവഹിതം ചെയ്യാം

നിങ്ങളെ അവിടത്തെ ഇഷ്ടം ചെയ്യാനായി സകലനന്മകളാലും സമ്പൂർണരാക്കുകയും അവിടത്തേക്കു പ്രസാദമുള്ളത് യേശുക്രിസ്തുവിലൂടെ നമ്മിൽ നിറവേറ്റുകയുംചെയ്യട്ടെ!
എബ്രായർ 13:21

വിജയികളായി തീർന്നവർ എല്ലാവരും കാഠിന്യമേറിയ പരിശീലന കളരിയിലൂടെ കടന്നുപോയവരാണ്. കഠിനമായ പരിശീലനം പലപ്പോഴും നമുക്ക് അസഹനീയമാണ്. പരിശീലനങ്ങളിലൂടെ നമുക്ക് പിഴവുകൾ തിരുത്തുവാൻ കഴിയും. അത് നമ്മിൽ വലിയ വ്യത്യാസങ്ങൾ വരുത്തും. അത് നമ്മെ കഴിവുള്ളവരും സമ്പൂർണ്ണരും ആക്കി മാറ്റും. തിരിഞ്ഞുനോക്കുമ്പോൾ നമ്മിൽ വന്ന മാറ്റങ്ങൾ തീർച്ചയായും നമ്മെ അത്ഭുതപ്പെടുത്തും.

“റൈഫി വിന്‍സന്റ് ഗോമസിനൊപ്പമുള്ള പരിശീലനം ക്രിക്കറ്റില്‍ മാത്രമല്ല ഗുണംചെയ്തത്. മികച്ച വ്യക്തിയാകാനും സഹായിച്ചു” മലയാളി ക്രിക്കെറ്റ് താരം സഞ്ജു സാംസൺ പറഞ്ഞു. ലോക്ഡൗണിനെത്തുടര്‍ന്ന് ക്രിക്കറ്റ് ഇല്ലാതിരുന്ന നാലഞ്ച് മാസം ജിമ്മിലും പവര്‍ ഹിറ്റിങ് പരിശീലനത്തിലുമായിരുന്നു സഞ്ജു. കൂടുതല്‍ സിക്സറുകള്‍ അടിക്കാന്‍ ജിമ്മിലെ പരിശീലനം സഹായിച്ചു. ക്രിക്കറ്റ് കളിക്കുന്നിടത്തോളം കാലം ഫിറ്റ് ആയിരിക്കാന്‍ കോലി നല്‍കിയ ഉപദേശം സ്വീകരിച്ചാണ് സഞ്ജു കടുത്ത പരിശീലനം ആരംഭിച്ചത്.

കോച്ചിൻ്റെ നിർദ്ദേശങ്ങളനുസരിച്ച് പരിശീലനത്തിൽ വരുത്തുന്ന മാറ്റങ്ങളാണ് പ്രകടനത്തിൽ മികവ് പുലർത്തുവാൻ ഒരു ക്രിക്കറ്ററെ സഹായിക്കുന്നത്. അതുവരെ തുടർന്നുപോന്ന പല കാര്യങ്ങളും പരിശീലനത്തിനായി ഉപേക്ഷിക്കേണ്ടിവരും. കൊച്ചിനോട് മുഷിഞ്ഞിട്ട് കാര്യമില്ല. മാറ്റങ്ങൾ വരുത്തിയില്ലെങ്കിൽ നഷ്ടം നമുക്കുതന്നെയാണ്.

നാം ദൈവഹിതം ചെയ്യണമെന്ന് ദൈവം ആഗ്രഹിക്കുന്നു. യേശുക്രിസ്തുവിൽകൂടെ മാത്രമേ ദൈവത്തിനു പ്രസാദമുള്ള പ്രവർത്തി മനുഷ്യർക്ക് ചെയ്യുവാൻ കഴിയുകയുള്ളൂ. അതിനായി പിതാവ് നമ്മെ പരിശുദ്ധാത്മാവിനാൽ രൂപാന്തരപ്പെടുത്തുന്നു. നമ്മെ സമ്പൂർണ്ണരാകുക എന്നതാണ് ലക്ഷ്യം. പരിശുദ്ധാത്മാവിനാൽ സ്വയം യഥാസ്ഥാനപ്പെടുത്തി പൂർണ്ണതയുള്ളവരായി തീർന്നാൽ മാത്രമാണ് ദൈവേഷ്ടം നമുക്ക് തിരിച്ചറിയുവാൻ സാധിക്കൂ. നാഥൻ്റെ നമ്മിലുള്ള പ്രവർത്തി തിരിച്ചറിയാം. അവനായി ജീവിക്കാം. അവൻ നിർദേശിക്കുന്ന പരിശീലനങ്ങൾ മുറ തെറ്റാതെ പൂർത്തിയാക്കാം.