hallelujah-പ്രതിദിന ധ്യാനം-നന്മ ചെയ്യുക, ഓർമ്മിപ്പിക്കുന്നത് ദൈവമാണ്

✍️ ജസ്റ്റിൻ കായംകുളം
നന്മ ചെയ്യുക, ഓർമ്മിപ്പിക്കുന്നത് ദൈവമാണ്
ജോലി രാജാവിൻ്റെ കൊട്ടാരത്തിൻ്റെ വാതിലിൽ കാവൽക്കാരൻ ആയിട്ടായിരുന്നു. വലിയ വിലയൊന്നും ഇല്ലാത്ത ജോലി. ആരും അവനെ ബഹുമാനിക്കേണ്ട ആവശ്യവുമില്ല. അയാൾ എല്ലാവരെയും ബഹുമാനിക്കണം.

ജോലി ചെറുതോ വലുതോ ആയിക്കൊള്ളട്ടെ പക്ഷേ താൻ ഒരു യഹൂദൻ ആണ് എന്ന ബോധ്യം മൊർദെഖാ യ്ക്കുണ്ടായിരുന്നു.

അമാലേക്കിൻ്റെ ഓർമയെ ഛേദിച്ചുകളയും എന്ന വചനം അവൻ്റെ മനസ്സിൽ ഉണ്ടായിരുന്നത് കൊണ്ട് ഹാമാനെ ബഹുമാനിക്കാൻ അവൻ തുനിഞ്ഞില്ല. എല്ലാവരും കുമ്പിടുന്നവരെ ഒരു ദൈവപൈതൽ കുമ്പിടേണ്ട കാര്യമില്ല.

തന്നെ കുമ്പിടാൻ തയ്യാറാകാതിരുന്നവനെ തകർക്കാൻ അസൂയയുടെ ഹാമാന്യ ഭാവം തയ്യാറായപ്പോൾ വിലയില്ലാതിരുന്ന കാവൽക്കാരനെ മാനിക്കാൻ ദൈവീക പദ്ധതി തയ്യാറായി.

അന്ന് രാത്രിയിൽ രാജാവിന് ഉറക്കം വന്നില്ല. ദിനവൃത്താന്ത പുസ്തകം വായിച്ചു കേട്ടു. അതിൽ തനിക്ക് വേണ്ടി മൊർദെഖായി ചെയ്ത നന്മ രാജാവിന് മനസ്സിലായി. രാജാവ് ബഹുമാനിക്കാൻ ഇച്ഛിക്കുന്ന പുരുഷന് എന്ത് ചെയ്യണമെന്ന് മോർദ്ദേഖായിയുടെ നാശം കാണാൻ ആഗ്രഹിച്ചവനെക്കൊണ്ട് തന്നെ ദൈവം ശുപാർശ ചെയ്യിപ്പിച്ചു.

പലർക്കും നന്മ ചെയ്തിട്ടും അവർ ഓർക്കുന്നില്ല എന്ന് ചിന്തിക്കാറില്ലേ.
ചിലപ്പോൾ നമ്മുടെ ജീവിതത്തിലേക്ക് ഹാമാൻമാരുടെ കഴുമരം നീണ്ടു വരുമ്പോൾ ദൈവം ചിലരുടെ ഉറക്കം കെടുത്തും. അന്നവർ നാം ചെയ്ത നന്മകൾ ഓർക്കും.

നന്മ ചെയ്കയിൽ മടുത്തു പോകരുത് ആരും കണ്ടില്ലെങ്കിലും കാണുന്ന ഒരു ദൈവമുണ്ട്.
ദൈവനാമത്തിൽ ചെയ്തിട്ടുള്ള ഓരോ ചെറിയ കാര്യങ്ങളും അവൻ്റെ പുസ്തകത്തിൽ രേഖപ്പെടുത്തിയിട്ടുണ്ട്.മറ്റാരും അത് കണ്ടില്ലെങ്കിലും കേട്ടില്ലെങ്കിലും ദൈവം നമുക്ക് വേണ്ടി തക്ക സമയത്തു അത് ഓർക്കും.