Hallelujah- പ്രതിദിന ധ്യാനം

തോംസൺ പത്തനാപുരം

അബ്രഹാമിൻ്റെ സന്തതി ആയിത്തീരാം

ക്രിസ്തുവിനുള്ളവർ എങ്കിലോ നിങ്ങൾ അബ്രാഹാമിൻ്റെ സന്തതിയും വാഗ്ദത്തപ്രകാരം അവകാശികളും ആകുന്നു.
ഗലാത്യര്‍ 3:29

വിശ്വാസം ഇല്ലാത്തവരായി ആരും ഇല്ല. നാമെല്ലാവരും അറിയപ്പെടുന്നത് ക്രിസ്തു വിശ്വാസികൾ എന്നാണല്ലോ. ഒരു നിരീശ്വരവാദിക്ക് പോലും വിശ്വാസമുണ്ട്. അത് ദൈവം ഇല്ല എന്നാണെന്നു മാത്രം.

വിശുദ്ധ വേദപുസ്തകം വിശ്വാസ വീരന്മാരെക്കുറിച്ച് വിവരിക്കുന്നുണ്ട്. അവരിൽ വിശ്വപ്രസിദ്ധനാണ് അബ്രഹാം. അബ്രഹാം വാഗ്ദത്തിനായി വിശ്വാസത്താൽ കാത്തിരുന്നു, വചനമാകുന്ന യേശുക്രിസ്തുവിൽ അവൻ വിശ്വസിച്ചു. വിശ്വാസത്തിന്‍റെ ഭൂമികയില്‍നിന്ന് നോക്കിയ അബ്രഹാം നക്ഷത്രങ്ങള്‍ക്കപ്പുറമുള്ള ദൈവികവാഗ്ദാനവും വിശ്വസ്തതയും ദര്‍ശിച്ചു. അവൻ്റെ വിശ്വാസം അവനെ വിശ്വാസികളുടെ പിതാവാക്കിമാറ്റി.

ക്രിസ്തുവിലുള്ള വിശ്വാസത്താൽ നാം അബ്രഹാമിൻ്റെ സന്തതികൾ ആകുന്നു. നമ്മുടെ പരിമിതമായ മനോഭാവങ്ങളില്‍നിന്ന് കാഴ്ചകള്‍ക്കപ്പുറമുള്ള വിശാലമായ ദൈവികയാഥാര്‍ത്ഥ്യത്തിലേക്ക് അബ്രഹാമിനെപോലെ നാം ഉയരണം. ദൈവത്തിന്‍റെ വാഗ്ദാനങ്ങളുടെ പൂര്‍ത്തീകരണം നമ്മളിലും സംഭവിക്കണം അതിന് നമ്മുടെ കൂടാരങ്ങളില്‍നിന്ന് നാം പുറത്തിറങ്ങണം.

വിശ്വാസത്തിൻ്റെ നായകനും പൂർത്തി വരുത്തുന്നവനുമായ യേശുക്രിസ്തുവിൽകൂടി അബ്രഹാമിൻ്റെ സന്തതിയായിതിർന്ന് വാഗ്ദത്തങ്ങൾ പ്രാപിക്കാം. അവിശ്വാസി ആകാതെ വിശ്വാസത്തിൽ ഉറച്ചു നിൽക്കാം. അവകാശങ്ങൾ പ്രാപിക്കാം. വാഗ്ദത്തം ചെയ്തവൻ വിശ്വസ്തൻ.