hallelujah-പ്രതിദിന ധ്യാനം

✍️ ജസ്റ്റിൻ കായംകുളം l തമ്പുരാൻ കൂടെയുണ്ട്. തളരേണ്ട കാര്യമില്ല

താനോ മരുഭൂമിയിൽ ഒരു ദിവസത്തെ വഴി ചെന്നു ഒരു ചൂരച്ചെടിയുടെ തണലിൽ ഇരുന്നു മരിപ്പാൻ ഇച്ഛിച്ചു; ഇപ്പോൾ മതി, യഹോവേ, എൻ്റെ പ്രാണനെ എടുത്തുകൊള്ളേണമേ.
1 രാജാക്കന്മാർ 19:4

മരിക്കുവാനുള്ള അതിയായ വാഞ്ജ. ഒറ്റപ്പെടലുകളും തള്ളിക്കളയുന്ന അനുഭവങ്ങളും. വിഷാദവും നിരാശയും നിറഞ്ഞ സംഘർഷഭരിതമായ സാഹചര്യങ്ങൾ. നിയോഗവും അഭിഷേകവും ശുശ്രുഷയും തിരിച്ചറിവുണ്ടെങ്കിലും മുൻപോട്ടു പോകുവാൻ കഴിയാത്ത അവസ്ഥകൾ. തെറ്റുകൾക്ക് നേരെ പ്രതികരിക്കുകയും മുഖത്തു നോക്കി അഭിപ്രായങ്ങൾ പറയുകയും ചെയ്യുന്ന പ്രകൃതക്കാരൻ.

ദൈവം ഏൽപ്പിച്ച ശുശ്രുഷയ്ക്കു വേണ്ടി നെഞ്ചും വിരിച്ചു നിന്നവൻ ഇപ്പോൾ ഇസബെൽ എന്നവളുടെ നിസ്സാരപ്പെടുത്തുന്ന ഭീഷണിക്കു മുൻപിൽ മരണത്തെക്കുറിച്ചു ചിന്തിക്കുന്നു. ആരോടും മിണ്ടാതെ ഭക്ഷണം കഴിക്കാതെ തളർന്നു മയങ്ങി ചൂരച്ചെടിയുടെ അടിയിൽ ഒതുങ്ങി കിടക്കുകയാണ്.

പക്ഷെ വിളിച്ചിറക്കിയ ദൈവം വിട്ടു കൊടുത്തില്ല. ദൂതനെ അയച്ചു തട്ടി എഴുന്നേൽപ്പിച്ചു. ഭക്ഷണവും വെള്ളവും നൽകി നിർബന്ധിച്ചു വീണ്ടും അയക്കുകയാണ്. അവനു വേണ്ടിയുള്ള ലക്ഷ്യത്തിലേക്കു. ദൈവം തുറന്നിട്ട പാതയിലേക്ക് അവൻ ഓടുകയാണ് വിശ്രമമില്ലാതെ.

ഇന്ന് നീ പോകുന്ന സാഹചര്യങ്ങളിൽ ദൈവദൂതൻ ഇറങ്ങിവരും. നിരാശ മാറി വിഷാദം നീങ്ങി, ഭയം മാറി ധൈര്യത്തോടെ ദൈവം തുറക്കുന്ന പാതയിൽ കൂടി ഓടുവാൻ. നിനക്കൊരു ശുശ്രുഷയുണ്ട്, നിയോഗമുണ്ട് എല്ലാത്തിലുമുപരി തമ്പുരാൻ കൂടെയുണ്ട്. തളരേണ്ട കാര്യമില്ല.