ധ്യാനം: അവൻ്റെ മഹാ കരുണ

തോംസൺ പത്തനാപുരം

അവൻ്റെ മഹാ കരുണ

യഹോവ കരുണയും കൃപയും നിറഞ്ഞവൻ ആകുന്നു; ദീർഘക്ഷമയും മഹാദയയും ഉള്ളവൻ തന്നെ. സങ്കീര്‍ത്തനങ്ങള്‍ 103:8

ജീവിതത്തിൽ ചിലപ്പോഴെങ്കിലും മടുപ്പ് അനുഭവപ്പെടാത്തവരായി ആരുമില്ല. അത് മനുഷ്യസഹജമാണ്. കരുണ അനുഭവിക്കുക എന്നത് ഹൃദ്യമായ ഒരു അനുഭവമാണ്. എന്നാൽ അത് മറ്റുള്ളവർക്ക് പകർന്നു നൽകുക ഒരു ചെറിയ ശതമാനം ആളുകൾക്ക് അസഹ്യമായ കാര്യമാണ്. ക്ഷമിച്ച് ക്ഷമിച്ച് മടുക്കുമ്പോൾ പലപ്പോഴും നാം കരുണ കാണിക്കാൻ മടിക്കാറുമുണ്ട്.

നമ്മുടെ കർത്താവ് കരുണയുള്ള ദൈവമാണ്. നാം ഇന്ന് ജീവനോടിരിക്കുന്നത് അവൻ്റെ കൃപ ഒന്നുകൊണ്ടുമാത്രമാണ്. പാപം ചെയ്ത് ദൈവതേജസ്സ് നഷ്ടപ്പെട്ട് മരണത്തിനായി വിധിക്കപ്പെട്ടവരായിരുന്ന നമ്മെ തൻ്റെ മഹാ കരുണയാൽ കർത്താവ് വീണ്ടെടുത്തു. പിതാവ് അതിനായി യേശു കർത്താവിനോടുള്ള തൻ്റെ കരുണ മറച്ചു കളഞ്ഞു. യേശു കർത്താവിനോട് പിതാവാം ദൈവം കരുണ കാണിച്ചില്ല. നമ്മെ തൻ്റെപുത്രീ പുത്രന്മാരാക്കുവാൻ സ്വന്ത പുത്രനോട് കരുണകാണിക്കാതെ കാൽവരിയിൽ മുഖം തിരിച്ചുകളഞ്ഞ കാഴ്ച്ച വചനം നമ്മുടെമുൻപിൽ വരച്ചുകാണിക്കുന്നു.

നമ്മോട് കരുണ കാണിക്കുന്നവരോട് മാത്രമല്ല നമ്മെ ഉപദ്രവിക്കുന്നവരോടും കരുണ കാണിക്കണമെന്ന് കർത്താവ് നമ്മെ പഠിപ്പിക്കുന്നു. നാം പ്രാപിച്ച അവൻ്റെ മഹാ കരുണ അലക്ഷ്യമാക്കാതെ ജീവിക്കുവാൻ ദൈവം നമ്മെ സഹായിക്കട്ടെ. അവൻ്റെ കരുണ ഇതുവരെയും പ്രാപിക്കാത്തവർക്ക് ആ കരുണ പകർന്നു നൽകുവാൻ ദൈവം നമ്മെ ഇന്ന് പകൽ കാലം സഹായിക്കട്ടെ.