1917 ഓഗസ്റ്റ് : 31 കുക്ക് സായിപ്പിൻ്റെ ഭാര്യ അന്നയുടെ മരണം

ഇന്ത്യയിലെ പെന്തെക്കോസ്ത് പ്രവർത്തനങ്ങൾക്ക് അടിത്തറയിട്ടവരിൽ പ്രമുഖനായ അമേരിക്കൻ മിഷനറി റവ.ആർ.എഫ് കുക്കിൻ്റെ ആദ്യ ഭാര്യ അന്ന ബാംഗ്ലൂരിൽ മരണമടഞ്ഞു. 1912-ൽ ഇന്ത്യയിലെത്തിയ ഈ മിഷനറി ദമ്പതികൾ ആദ്യ ഘട്ടത്തിൽ ബാംഗ്ലൂരിലും തമിഴുനാട്ടിലെ തിരുനൽവേലിയിലും പ്രവർത്തിച്ചു. ഇടക്കിടെ തിരുവിതാംകൂറിൽ സന്ദർശനം നടത്തിയ കുക്ക് പിൽക്കാലത്ത് തൻ്റെ പ്രവർത്തന മേഖലയായി കേരളത്തെ തിരഞ്ഞെടുക്കുകയായിരുന്നു.

നേരത്തെ തന്നെ ശാരീരിക പ്രയാസങ്ങൾ അനുഭവിച്ചിരുന്ന അന്ന അതൊന്നും വകവെക്കാതെ സുവിശേഷ വേലയിൽ ഭർത്താവിനോടൊപ്പം സജീവമായിരുന്നു. ബാംഗ്ലൂർ ഫ്രെയ്സൺ ടൗൺ കേന്ദ്രമാക്കി ഒരു ഇംഗ്ലീഷ് ആരാധനയും മറ്റ് പ്രവർത്തനങ്ങളും നടത്തിയിരുന്നു.

രോഗബാധിതയായ അന്ന തികഞ്ഞ പ്രത്യാശയോടെ 1917 ആഗ.17 ന് നിത്യതയിലേക്ക് ചേർക്കപ്പെട്ടു. രണ്ടു പെൺമക്കളാണ് ഈ ദമ്പതികൾക്ക് ഉണ്ടായിരുന്നത്. ബ്ലോസവും ഡൊറോത്തിയും. റവ. കുക്ക് ഇന്ത്യയിലേക്ക് മിഷനറി പ്രവർത്തനത്തിനായി പോകുവാൻ തീരുമാനമെടുത്തപ്പോൾ പൂർണ മനസോടെ അതിനൊപ്പം നിന്ന അന്നയുടെ സമർപ്പണമാണ് ഇന്ത്യക്ക് റവ. ആർ.എഫ് കുക്കെന്ന മഹാനായ മിഷനറിയെ ലഭിക്കാൻ കാരണമായത്. ആദരവോടെ ഓർക്കാം ആ ധീര വനിതയെ.
പിന്നീട് റവ. കുക്ക് ബർത്താ ഫോക്സ് എന്ന സമർപ്പിതയായ മിഷനറി വനിതയെ വിവാഹം കഴിച്ചു.