വാക്കുകൾ വിചാരങ്ങൾ – പി. എസ്. ചെറിയാൻ

മുറിക്കുന്നവൻ, മുറിവ് കെട്ടുന്നവൻ

ബ്രിട്ടീഷുകാർ ഇന്ത്യ ഭരിക്കുന്ന കാലത്ത് കിച്ച്നർ പ്രഭു ആയിരുന്നു സൈന്യാധിപൻ. ആഫ്രിക്കയിലെ ബൂ വർഗക്കാരും ഇംഗ്ലീഷുകാരും തമ്മിൽ യുദ്ധം നടന്ന കാലത്ത് അദ്ദേഹം തന്നെയായിരുന്നു സൈനികമേധാവി. പട്ടാളത്താവളത്തിൽ വെളിച്ചം കണ്ടാൽ ശത്രുക്കൾ ആക്രമിക്കും എന്നത് ഉറപ്പ് ആയതുകൊണ്ട് രാത്രിയിൽ വിളക്കണച്ചു കിടക്കണം എന്ന് കർശന നിർദ്ദേശം അദ്ദേഹം നൽകിയിരുന്നു. എല്ലാവരും അത് അനുസരിക്കുന്നുണ്ടോ എന്നു പരിശോധിക്കുവാൻ കിച്ച്നർ അർദ്ധരാത്രിയിൽ സൈനിക കൂടാരങ്ങൾ സന്ദർശിച്ചു. അതാ! ഒരിടത്ത് വെളിച്ചം. അയാൾ അവിടേക്ക് നടന്നു. ഒരു പട്ടാളക്കാരൻ മെഴുകുതിരി വെട്ടത്തിൽ ഭാര്യക്ക് കത്തെഴുതുകയാണ്. കത്തെഴുതി പൂർത്തിയായപ്പോൾ അയാൾക്കു പിന്നിൽ നിന്ന് കിച്ച്നർ പറഞ്ഞു: ” ഇത് അവസാനത്തെ കത്ത് ആണെന്ന് കൂടെ എഴുതിക്കോളൂ.” പട്ടാളക്കാരൻ ഞെട്ടിവിറച്ചു. അടുത്തദിവസം രാവിലെ എല്ലാ സൈനികരുടെയും മുൻപിൽ വച്ച്, ഗുരുതരമായ വീഴ്ച വരുത്തിയ ആ പട്ടാളക്കാരനെ വെടിവെച്ചുകൊന്നു. കല്ലന അനുസരിക്കാത്തതിൻ്റെ ശിക്ഷ മറ്റുള്ളവരും മനസിലാക്കാൻ വേണ്ടിയായിരുന്നു അങ്ങനെ ചെയ്തത്.

അനുസരിക്കുന്നത് യാഗം അർപ്പിക്കുന്നതിനേക്കാൾ ഉത്തമമാണെന്ന് തിരുവെഴുത്ത് പഠിപ്പിക്കുന്നു. നിയമങ്ങളുടെ ലംഘനമാണ് പലരും നശിച്ചു പോകുവാൻ കാരണം. നിയമലംഘനം ഒരാൾക്കു മാത്രമല്ല, ഒരു സമൂഹത്തിനു തന്നെ ദുരിതവും നാശവും വരുത്തും. ചിലർ ശിക്ഷയെ ഭയന്നാണ് അനുസരിക്കുന്നത്. മറ്റു ചിലരാകട്ടെ സ്നേഹംകൊണ്ട് അനുസരിക്കും. “ദുഷ്ടന്മാർ ഭയംകൊണ്ട് അനുസരിക്കുന്നു, ശിഷ്ടന്മാർ സ്നേഹംകൊണ്ട് അനുസരിക്കുന്നു” എന്നാണ് ചിന്തകനായ അരിസ്റ്റോട്ടിൽ പറഞ്ഞിട്ടുള്ളത്.

ഇപ്പോഴത്തെ ശിക്ഷാവിധികൾ കുറ്റവാളികൾക്ക് സ്വഭാവവ്യത്യാസവും അനുതാപവും ഉണ്ടാകുവാൻ ഉദ്ദേശിച്ചുള്ളതാണ്. തടവറയിൽ അവരെ സൂക്ഷിക്കുന്നത് അതും കൂടെ ലക്ഷ്യമിട്ടാണ്. പലപ്പോഴും അവർ പഴയതിലും കൂടുതൽ കുറ്റവാസന ഉള്ളവരാകുന്നു. ചില രാജ്യങ്ങളിൽ ശിക്ഷ ഉടൻതന്നെ നൽകുകയാണ് പതിവ്.
ശിക്ഷകളിൽ നിന്നു പഠിക്കുവാൻ കഴിയുന്നതാണ് ജീവിതം സമാധാന പൂർണമാക്കുന്നത്. ജോൺ ബനിയൻ ഒരിക്കൽ ഇങ്ങനെ പറഞ്ഞു, ” ശിക്ഷ എപ്പോഴും വേദനാജനകമാണ്. എന്നാൽ അതിൽ നിന്ന് നല്ല ഫലം ഉണ്ടായാൽ എത്ര സന്തോഷകരമായിരിക്കും. ”

സ്വിറ്റ്സർലൻഡിലെ പർവതങ്ങൾ കയറാനെത്തിയ ഒരു സ്ത്രീ ഒരു ആട്ടിടയൻ ആടുകളെ സൂക്ഷിക്കുന്ന സ്ഥലത്തു ചെന്നു. ഇടയൻ ഒരിടത്ത് ഇരിക്കുന്നു. ആടുകൾ ചുറ്റിലും കിടക്കുകയാണ്. പക്ഷേ, അവിടെ വൈക്കോലിന്മേൽ ഒരു ആട് കിടക്കുന്നു. അതിൻ്റെ കാലിൽ മുറിവ് കിട്ടിയിട്ടുണ്ട്. വേദനയോടെയാണ് അത് കിടക്കുന്നത്. “ഈ ആടിന് അപകടം പറ്റിയതാണോ? ” സ്ത്രീ ചോദിച്ചു. “അല്ല. അപകടം പറ്റാതിരിക്കാൻ ഞാൻ തന്നെ അതിൻ്റെ കാല് തല്ലി ഒടിച്ചതാണ്.” സ്ത്രീ അയാളെ ആശ്ചര്യത്തോടെ നോക്കിയപ്പോൾ ഇടയൻ തുടർന്നു, “ഈ ആട് പർവ്വതങ്ങളിലെ പാറക്കെട്ടുകളിൽ കയറി പ്പോകും. കൂട്ടം വിട്ടുനടക്കും. മറ്റ് ആടകളും അത് അനുകരിക്കാൻ തുടങ്ങി. അത് വലിയ അപകടമാണ് വരുത്തിവയ്ക്കുക. അതുകൊണ്ട് ഞാൻ തന്നെ ഇതിൻ്റെ കാലൊടിച്ചു. ഇവിടെ കൊണ്ടുവന്ന് മുറിവുകൾ മരുന്നു വച്ചു കെട്ടി. ആദ്യമൊക്കെ ആഹാരം കൊടുത്താൽ ഇടിക്കാൻ വരുമായിരുന്നു. ഇപ്പോൾ സ്വഭാവത്തിൽ മാറ്റം ഉണ്ട്. കുറച്ചു ദിവസം കൂടി കഴിഞ്ഞാൽ സുഖം പ്രാപിക്കും. അപ്പോൾ നല്ല അനുസരണശീലം ഉണ്ടാകും.”

തിരുവെഴുത്തുകളിൽ നാം ഇങ്ങനെ വായിക്കുന്നു: ”ദൈവം ശാസിക്കുന്ന മനുഷ്യൻ ഭാഗ്യവാൻ; സർവ്വശക്തൻ്റെ ശിക്ഷ നിരസിക്കരുത്. അവൻ മുറിവേൽപ്പിക്കുകയും മുറിവു കെട്ടുകയും ചെയ്യുന്നു. അവൻ ചതെക്കയും തൃക്കൈ പൊറുപ്പിക്കയും ചെയ്യുന്നു ” ( ഇയ്യോബ് 5: 17 ,18). സങ്കീർത്തനങ്ങളിൽ ഭക്തൻ പാടുന്നത് നോക്കുക: “നിൻ്റെ ചട്ടങ്ങൾ പഠിപ്പാൻ തക്കവണ്ണം ഞാൻ കഷ്ടതയിൽ ആയിരുന്നത് എനിക്കു
ഗുണമായി ” (സങ്കീർത്തനം119:71). തിരുവെഴുത്തുകൾ ഉപദേശത്തിനും ശാസനത്തിനും ഗുണീകരണത്തിനും നീതിയിലെ അഭ്യാസത്തിനും ഉള്ളതെന്ന് വിശുദ്ധ പൗലൊസ് എഴുതി( 2 തിമൊ 3:16, 17 ) . ദൈവത്തെ അനുസരിക്കുവാനും ദൈവഹിതം ചെയ്യുവാനും നാം സമർപ്പിക്കേണ്ടതുണ്ട്. കല്പനാ ലംഘനങ്ങളിൽ ദൈവം നൽകുന്ന മുറിവുകൾ നാം വ്യത്യാസപ്പെടുവാനാണ്. ദൈവം നമ്മെ സ്നേഹിക്കുന്നതുകൊണ്ട് ശിക്ഷിക്കുന്നു. നമ്മുടെ മുറിവുകളിൽനിന്ന് പഠിക്കുവാൻ നമുക്ക് കഴിയുന്നുണ്ടോ?

+91 9349500155 /6282936289

വെളിപ്പാട് പുസ്തക വ്യാഖ്യാനം എന്ന ബൃഹത് കൃതിയുടെ രചയിതാവും ബൈബിൾ ടീച്ചറും ചിത്രകാരനുമായ പാസ്റ്റർ പി അതിരൂപൻ്റെ പുതിയ പുസ്തകം സമാഗമനകൂടാരം

വില 400 രൂപ  ഇപ്പോൾ 350 രൂപക്ക് ലഭിക്കുന്നു.(പോസ്റ്റജ് ഉൾപ്പെടെ)

താൽപ്പര്യമുള്ളവർ ഇവിടെ ക്ലിക് ചെയ്ത് നിങ്ങളുടെ പൂർണ വിലാസം മെസേജ് ആയി അയക്കുക. പുസ്തകം VPP ആയി അയച്ചുതരും.  (മുൻകൂട്ടി ബുക്ക് ചെയ്തിട്ടുള്ളവർ വീണ്ടും അഡ്രസ് അയക്കേണ്ടതില്ല.)

---

  ഹാലേലൂയ്യാ പത്രത്തിൻ്റെ വരിക്കാരാകുക.  ഒരു വർഷത്തേക്ക് 200 രൂപ. രണ്ടുവർഷത്തെ വരിസംഖ്യ (Rs 400) ഒന്നിച്ചു അടക്കുന്നവർക്കു മനോഹരമായ ഒരു പുസ്തകം സൗജന്യമായി ലഭിക്കും. പുസ്തകം വീട്ടിൽ എത്തിക്കുമ്പോൾ വരിസംഖ്യ അടച്ചാൽ മതി. താൽപ്പര്യമുള്ളവർ നിങ്ങളുടെ പൂർണ്ണ വിലാസം പിൻകോഡ് ഫോൺ നമ്പർ എന്നിവ for Hallelujah എന്ന സന്ദേശത്തോടെ 974 429 4144 എന്ന നമ്പറിലേക് WhatsAap ചെയ്യുക.

---