ദുഷ്ടങ്കൽ നിന്നുവിടുവിക്കേണമേ…
ഒരിക്കൽ സൺഡേ സ്കൂളിൽ അധ്യാപകൻ കുട്ടികളെ
ഹൃദയനൈർമല്യത്തെപ്പറ്റിയും മറ്റുള്ളവരോടുള്ള സ്നേഹബന്ധം പവിത്രമായി സൂക്ഷിക്കുന്നതിനെപ്പറ്റിയും പഠിപ്പിച്ചു. പരസ്പരം ക്ഷമിക്കുകയും സ്നേഹിക്കുകയും ചെയ്തില്ലെങ്കിൽ ദൈവരാജ്യത്തിൽ പ്രവേശിക്കുകയില്ല എന്ന് അവർ മനസ്സിലാക്കി. അക്കൂട്ടത്തിൽ ഉണ്ടായിരുന്ന ഒരു കുട്ടി അന്നുവൈകിട്ട് അമ്മൂമ്മയോടൊപ്പം പ്രാർത്ഥനയ്ക്ക് ഇരുന്നു. “കർത്താവേ, ഇന്നു രാത്രി ഉറങ്ങി ഉണരുന്നതിനു മുമ്പ് മരിക്കാൻ ഇടയായാൽ അവിടുന്ന് ദൈവരാജ്യത്തിൽ ചേർത്തുകൊള്ളണേ” എന്ന് അമ്മൂമ്മ പ്രാർത്ഥിച്ചത് കേട്ട ഉടൻ കുട്ടി അടുത്ത മുറിയിലേക്ക് ഓടി.
അവിടെ അവൻ്റെ അനുജൻ കട്ടിലിൽ ഉറങ്ങുകയായിരുന്നു. അവനോടുള്ള ദേഷ്യം നിമിത്തം അവൻ്റെ ഭംഗിയുള്ള പാവകൾ മൂത്തകുട്ടി തലകീഴായി വെച്ചിട്ടാണ് പ്രാർത്ഥിക്കുവാൻ പോയത്. അമ്മൂമ്മയുടെ പ്രാർത്ഥന കേട്ടപ്പോൾ ഉണ്ടായ കുറ്റബോധം നിമിത്തം അവൻ ആ പാവകളെ എല്ലാം ശരിയായ രീതിയിൽ വച്ചു. അവൻ്റെ തെറ്റുതിരുത്തിയശേഷം വീണ്ടും വന്ന് അമ്മൂമ്മയുടെ അടുത്ത് പ്രാർത്ഥനയിൽ പങ്കുചേർന്നു.
പ്രാർത്ഥന യഥാർത്ഥത്തിൽ ദൈവത്തെ വ്യത്യാസപ്പെടുത്താനുള്ളതല്ല. പ്രാർത്ഥിക്കുന്നവനെയാണ് അത് വ്യത്യാസപ്പെടുത്തേണ്ടത്. പ്രാർത്ഥനയിലൂടെ നാം ഹൃദയ നിർമലതയും നിഷ്കളങ്കതയും നേടണം. പ്രാർത്ഥന ഒരു രൂപാന്തര ശക്തിയായി ജീവിതത്തിൽ അനുഭവിക്കുവാൻ കഴിയണം.
ജീവിതത്തെ ദൈവത്തിൻ്റെ അടുക്കലേക്ക് കൊണ്ടുചെല്ലുന്നതാണ് പ്രാർത്ഥന എന്ന് വില്യം ബാർക്ലേയും പ്രാർത്ഥനയിൽ ദൈവം ലോകത്തെ രൂപാന്തരപ്പെടുത്തുന്നു എന്ന് ഇ.എം. ബൗണ്ട്സും പറഞ്ഞിട്ടുണ്ട്. നാം സംസാരിക്കുന്നത് യേശു കേൾക്കണമെന്ന് നാം ആഗ്രഹിക്കുന്നുവെങ്കിൽ യേശു സംസാരിക്കുന്നത് നാം കേൾക്കണം എന്നാണ് സി. എച്ച്. സർജൻ പറഞ്ഞത്. ദൈവത്തോട് സംസാരിക്കുമ്പോൾ ദൈവം നമ്മോടും സംസാരിക്കും. ബന്ധങ്ങൾ ശരിയാക്കുകയാണ് പ്രാർത്ഥനയിൽ സംഭവിക്കേണ്ടത്. നമ്മുടെ ആളത്തത്തിന്റെ സമ്പൂർണ്ണമായ മോചനമാണത്.
ആരാധനയുടെയും പ്രാർത്ഥനയുടെയും ഒരു ദൈവികതത്ത്വം യേശു പറഞ്ഞത് ഇങ്ങനെയാണ്: ” ഞാനോ നിങ്ങളോടു പറയുന്നത് സഹോദരനോട് കോപിക്കുന്നവൻ എല്ലാം ന്യായവിധിക്ക് യോഗ്യനാകും, സഹോദരനോട് നിസാരാ എന്നു പറഞ്ഞാലോ ന്യായാധിപസഭയുടെ മുമ്പിൽ നിൽക്കേണ്ടിവരും.മൂഢാ എന്നു പറഞ്ഞാലോ അഗ്നിനരകത്തിനു യോഗ്യനാകും. ആകയാൽ നിൻ്റെ വഴിപാട് യാഗപീഠത്തിങ്കൽ കൊണ്ടുവരുമ്പോൾ സഹോദരനുനിന്റെ നേരെ വല്ലതും ഉണ്ടെന്ന് അവിടെവച്ച് ഓർമ്മ വന്നാൽ നിൻ്റെ വഴിപാട് അവിടെ യാഗപീഠത്തിൻ്റെ മുമ്പിൽ വച്ചേച്ച്, ഒന്നാമതു ചെന്നു സഹോദരനോടു നിരന്നുകൊൾക. പിന്നെ വന്നു നിൻ്റെ വഴിപാടു കഴിക്കുക. നിൻ്റെ പ്രതിയോഗിയോടുകൂടെ വഴിയിൽ ഉള്ളപ്പോൾത്തന്നേ വേഗത്തിൽ അവനോട് ഇണങ്ങിക്കൊൾക. അല്ലാഞ്ഞാൽ പ്രതിയോഗി നിന്നെ ന്യായാധിപനും ന്യായാധിപൻ ചേവകനും ഏൽപ്പിച്ചിട്ട് നീ തടവിൽ ആയ്പോകും” (മത്തായി 5: 22-25).
നമ്മിൽ പ്രബലമാകുന്ന സ്വാർത്ഥതയും വിദ്വേഷവും ഹൃദയത്തെ സ്നേഹശൂന്യമാക്കുന്നു. ക്ഷമയുടെയും സ്നേഹത്തിന്റെയും അനുഭവ വിശേഷങ്ങൾ നമ്മിൽ നിന്നും അകന്ന് നാം ദുഷിച്ചഹൃദയത്തിന് ഉടമയാകുന്നു. ഇത് ഓരോ വ്യക്തിയുടെയും അനുഭവമാണ്. പ്രാർത്ഥനയ്ക്ക് ഇത്തരം അനുഭവങ്ങൾ തടസ്സമാകുന്നു. നിർമ്മലമായ ഒരു ഹൃദയമാണ് പ്രാർത്ഥനയിലൂടെ രൂപപ്പെടേണ്ടത്.
ചുങ്കക്കാരനും പരീശനും പ്രാർത്ഥിക്കുവാൻ ദൈവാലയത്തിൽ പോയ ഉപമയിൽ ചുങ്കക്കാരൻ
തന്നെത്തന്നെ കണ്ടെത്തി. പരീശനാകട്ടെ, സ്വയനീതിയിൽ നിറഞ്ഞു. സ്വയം കണ്ടെത്തിയ പ്രാർത്ഥനയാണ് ദൈവം സ്വീകരിച്ചത്. പ്രാർത്ഥനയിലൂടെ നാം ദൈവത്തിൻ്റെ മുഖം ദർശിക്കുന്നതു പോലെ നമ്മെത്തന്നെയും ദർശിക്കുവാൻ കഴിയണം. കുറവുകൾ കണ്ടെത്തി പശ്ചാത്താപത്തോടെ പരിഹരിക്കുന്നതാണ് സത്യസന്ധമായ ആത്മീയത.
ഒരിക്കൽ ഒരു രാജാവ് തൻ്റെ ഉദ്യോഗസ്ഥരെ വിളിച്ച് ഇങ്ങനെ പറഞ്ഞു: “നമ്മുടെ രാജ്യത്തെ ഏറ്റവും ദുഷ്ടനായ മനുഷ്യനെ തിരഞ്ഞുപിടിച്ച് രാജ സന്നിധിയിൽ കൊണ്ടുവരിക.” അവർ ഓരോരുത്തരും ദുഷ്ടനെ അന്വേഷിച്ച് നാടിൻ്റെ പലഭാഗത്തും സഞ്ചരിച്ചു. മന്ത്രിയും നഗരങ്ങളിലും നാട്ടിൻപുറങ്ങളിലും ഒക്കെ ദുഷ്ടനെ അന്വേഷിച്ചുനടന്നു. പക്ഷേ, ഏറ്റവും വലിയ ദുഷ്ടനെ കണ്ടെത്താൻ കഴിയാതെ അദ്ദേഹവും മടങ്ങിവന്നു. മന്ത്രി രാജാവിനോട് പറഞ്ഞു: ” മഹാരാജാവേ, അങ്ങ് കൽപ്പിച്ച പ്രകാരം ഈ രാജ്യത്തെ ഏറ്റവും വലിയ ദുഷ്ടനെ കൊണ്ടുവന്നിട്ടുണ്ട്. ”
“ഉടൻതന്നെ അവനെ എൻ്റെ മുമ്പിൽ ഹാജരാക്കുക ” – രാജാവ് പറഞ്ഞു.
‘ഞാൻ തന്നെയാണ് ഈ രാജ്യത്തെ ഏറ്റവും വലിയ ദുഷ്ടൻ. എന്നെക്കാൾ മോശക്കാരനെ എനിക്ക് കണ്ടെത്താൻ കഴിഞ്ഞില്ല.” മന്ത്രി അറിയിച്ചു. മന്ത്രിയുടെ ആത്മാർത്ഥതയിൽ രാജാവ് സന്തുഷ്ടനായി.
മറ്റുവ്യക്തികളെ നമ്മളെക്കാൾ കുറഞ്ഞവരായി കാണുന്ന മനോഭാവം നമ്മിൽ ഒക്കെയുണ്ട്. ” ആരെയും മറക്കാത്തവനും എല്ലാവരോടും സ്നേഹവും കരുണയും ഉള്ളവനുമായ വ്യക്തി ഈശ്വരന്റെ അത്യന്തപ്രീതിഭാജനം ആകുന്നു”എന്ന് ഭഗവദ്‌ഗീത പറയുന്നു. “മറ്റുള്ളവരെ തന്നെക്കാൾ ശ്രേഷ്ഠനെന്ന് എണ്ണണം” എന്നാണ് വിശുദ്ധ ബൈബിൾ പഠിപ്പിക്കുന്നത്. കർത്താവായ യേശു പഠിപ്പിച്ച പ്രാർത്ഥനയിൽ ‘ദുഷ്ടങ്കൽ നിന്നു ഞങ്ങളെ വിടുവിക്കേണമേ’ എന്ന് പ്രാർത്ഥിക്കുവാൻ പഠിപ്പിക്കുന്നുണ്ട്. “ഞാനാകുന്ന ദുഷ്ട മനുഷ്യനിൽ നിന്ന് എന്നെ രക്ഷിക്കേണമേ ” എന്നാണ് സെൻറ് അഗസ്റ്റിൻ പ്രാർത്ഥിച്ചത്. പ്രാർത്ഥന നമ്മെ ആന്തരിക
നൈർമല്യത്തിലേക്കു നയിക്കണം. ആത്മീയജീവിതം മനുഷ്യത്വത്തിന്റെ പൂർണ്ണതയിലേക്കുള്ള ഒരു യാത്രയാവണം.
ഹാലേലൂയ്യാ പത്രത്തിൽ നിന്ന് നിരന്തരം വാർത്തകൾ നിങ്ങളുടെ മൊബൈലിൽ ലഭിക്കുവാൻ ഇവിടെ ക്ലിക് ചെയ്ത് വാട്സ്ആപ് ഗൂപ്പിൽ ജോയിൻ ചെയ്യുക
