അഭിമുഖം: ജിൻസി സോമി ഹാലേലൂയ്യാ ലേഖിക
ഇന്ന് ഏറെ പ്രചാരമുള്ള സാഹസിക കായിക വിനോദമാണ് പാരാഗ്ലൈഡിംഗ്. ആകാശത്ത് ചിറകുവിരിച്ച് പക്ഷിയെപ്പോലെ പറന്നുനടക്കാനുള്ള മനുഷ്യൻ്റെ മോഹത്തിൻ്റെയും നിരന്തര പരിശ്രമത്തിന്റേയും ഫലം. പാരാഗ്ലൈഡിംഗിനു മുൻപ് തന്നെ പാര-ജമ്പിങ്ങ് സാഹസികരുടെ പ്രിയ വിനോദമായി മാറിയിരുന്നു. നൂറുകണക്കിന് അടി മുകളിൽനിന്നു ചുമലിൽ ഉറപ്പിച്ച ബാഗുമായി ചാടുക പാതിവഴിയിൽ പുറത്തുറപ്പിച്ച പാരച്യൂട്ട് വിടർന്ന് താഴേക്കുള്ള പതനം സാവകാശവും നിയന്ത്രണ വിധേയവുമാകുന്ന സംവിധാനം. അപകട സാധ്യതയുള്ളതും സാഹസികത നിറഞ്ഞതുമായ ഈ വിനോദം ആദ്യകാലങ്ങളിൽ പുരുഷന്മാരുടെ മാത്രം കുത്തകയായിരുന്നു. ഇന്നിപ്പോൾ സ്ത്രീപുരുഷ വ്യത്യാസമില്ലാതെ സാഹസികത ഇഷ്ട്ടപ്പെടുന്നവർക്കെല്ലാം ഈ വിനോദം സാധ്യമാണ്.
1974 ഒക്ടോബർ 24 നാണു കേരളത്തിൽനിന്നൊരു പെൺകുട്ടി ആദ്യമായി പാരാ ജമ്പ് ചെയ്യുന്നത്. പുനലൂർ എസ്.എൻ. കോളേജിൽ പ്രീഡിഗ്രി വിദ്യാർത്ഥിനിയായിരുന്ന ശാന്തമ്മ എന്ന ആ പെൺകുട്ടി ഇന്ന് സാഹസികത നിറഞ്ഞ ആ ഓർമകളുമായി കോട്ടയത്ത് ജീവിക്കുന്നു. കോട്ടയത്ത് നാട്ടകം അസംബ്ലീസ് ഓഫ് ഗോഡ് സഭാംഗമായ ശാന്തമ്മ തന്റെ ഓർമ്മചെപ്പ് ഹാലേലൂയ്യാ ലേഖിക ജിൻസി സോമിയുടെ മുന്നിൽ തുറക്കുന്നു.
പുനലൂർ എസ്.എൻ. കോളേജിൽ പ്രീഡിഗ്രിക്കു പഠിക്കുമ്പോൾ സ്പോർട്സ് ചാമ്പ്യനും എൻ.സി.സി. കേഡറ്റുമായിരുന്ന തനിക്ക് പാരാഗ്ലൈഡിംഗിന് സെലക്ഷൻ ലഭിച്ചു. ഒരു സംസ്ഥാനത്തു നിന്നു ഒരാൾക്ക് മാത്രമുള്ള ഇതിന്റെ തിരഞ്ഞെടുപ്പ് തിരുവനന്തപുരത്തു വച്ചായിരുന്നു .
ഒന്നര മാസത്തെ പരിശീലനത്തിനു ആഗ്രയിലുള്ള കേദേരിയ എന്ന എയർഫോഴ്സ് പാര റെജിമെന്റിലേക്ക് കൊണ്ടുപോയി. എയർഎക്സ്പീരിയൻസിനു വേണ്ടിയും ശരീരം ഫിറ്റ് ആകാനുമുള്ള പരിശീലനത്തിലൂടെ മാനസിക ശാരീരിക അവസ്ഥകൾ പാരാഗ്ലൈഡിന് ഉതകുന്നത് ആക്കുകയായിരുന്നു ലക്ഷ്യം. ഇന്ത്യൻ എയർഫോഴ്സിൽ പാരാ ജംപിന് ഉപയോഗിക്കുന്ന ‘പാക്കറ്റ്’ എന്ന യുദ്ധവിമാനത്തിൽ നിന്നാണ് താഴേക്ക് ചാടിയത്. ചാടുമ്പോൾ കുട നിവർന്നില്ല എങ്കിൽ ഡെഡ്ബോഡിയാണ് ലഭിക്കുക. എന്നാൽ സൺഡേ സ്കൂളിൽ ലഭിച്ച ആ ദൈവിക വിശ്വാസത്താൽ ദൈവം എപ്പോഴും എന്റെ കൂടെയുണ്ട് എന്നെ കൈവിടുകയില്ല എന്നുറപ്പുണ്ടായിരുന്നു. മത്തായിയുടെ സുവിശേഷം 11:10 ൽ പറയുന്നതുപോലെ ദൈവം എനിക്ക് മുൻപേ ദൂതനെ അയയ്ക്കും എന്ന് താൻ വിശ്വസിച്ചിരുന്നു. ആ പ്രായത്തിലും അസാധാരണമായ ആത്മധൈര്യം എനിക്കുണ്ടായിരുന്നു.
നാലു പ്രാവശ്യം രാവിലെയും ഒരു പ്രാവശ്യം വൈകുന്നേരവുമായി അഞ്ചു തവണ പാരാ ജമ്പ് ചെയ്തതിലൂടെ ലഭിച്ച സർട്ടിഫിക്കറ്റ് ശാന്തമ്മ ഇന്നും അപൂർവ നിധിയായി സൂക്ഷിക്കുന്നു.
അന്ന് വനിതാ പോലീസിൽ ഒക്കെ ജോലി കിട്ടാൻ എളുപ്പമായിരുന്നു. എന്നാൽ പിതാവ് പോലീസിൽ ആയിരുന്നതുകൊണ്ട് സുരക്ഷിതത്വം കുറവായിരിക്കും എന്നുള്ള ഭയത്താൽ, വനിതാ പോലീസിലേക്ക് മകളെ അയയ്ക്കാൻ താല്പര്യപ്പെട്ടില്ല. 23 വയസ്സിൽ ജി. മോഹനുമായി വിവാഹിതയായതിനുശേഷം 5 മക്കളുടെ അമ്മയായി കുടുംബജീവിതം നയിച്ചു. പിന്നീട് തനിക്ക് ഒരു ജോലി ആവശ്യമുണ്ടെന്ന് തോന്നിയപ്പോൾ ദൈവത്തോട് പ്രാർത്ഥിച്ചു. വെയർഹൗസ് കോർപ്പറേഷനിൽ ജോലികിട്ടി. 30 വർഷത്തെ സർവീസിനുശേഷം ഇപ്പോൾ റിട്ടയർമെന്റ് ലൈഫിൽ ആയിരിക്കുന്നു.
പുനലൂരിൽ ഒരു സി എസ് ഐ പശ്ചാത്തലത്തിൽ ആയിരിക്കുമ്പോൾ തന്നെ അവിടെയുള്ള ഫസ്റ്റ് എ.ജി. ചർച്ചിൽ സൺ‌ഡേസ്കൂൾ പഠിക്കാൻ അമ്മ വിടുമായിരുന്നു. ആ സണ്ടേസ്കൂൾ പഠനമാണ് പെന്തെക്കോസ്ത് അനുഭവത്തിലേക്കും ഉറച്ച വിശ്വാസ അനുഭവങ്ങളിലേക്കും നയിച്ചത്.
1980 മാർച്ചിൽ സ്നാനപ്പെട്ടു, തുടർന്ന് 21 ദിവസം ഉപവാസ പ്രാർത്ഥനയിൽ മെയ്‌ 8 നു അഭിഷേകം പ്രാപിക്കുകയും ചെയ്തു. ജോലി ചെയ്യുമ്പോൾ തന്നെ ദിവസങ്ങളോളം ഉപവസിച്ചു പ്രാർത്ഥിക്കുവാനും സുവിശേഷ പ്രവർത്തനങ്ങളിൽ പങ്കാളിയാകാനും ശ്രദ്ധിച്ചിരുന്നു. ഞായറാഴ്ച ഉച്ചകഴിഞ്ഞ് മക്കളോടൊപ്പം പരസ്യ യോഗത്തിന് പോവുകയും ട്രാക്ട് വിതരണം നടത്തുകയുമൊക്കെ മുടങ്ങാതെ ചെയ്തിരുന്നു. തന്റെ അഞ്ചു മക്കളേയും ഉന്നത വിദ്യാഭ്യാസം നൽകിയതോടൊപ്പം ദൈവഭക്തിയിൽ വളർത്തി.
ഭർത്താവ് ജി മോഹൻ നിത്യതയിൽ വിശ്രമിക്കുന്നു. മക്കൾ ബീന കുടുംബമായി തിരുവനന്തപുരത്ത് താമസിക്കുന്നു. മകൻ ബിനു പ്രവീൺ കൊല്ലത്ത് കുടുംബമായി ശുശ്രൂഷയോടുള്ള ബന്ധത്തിൽ ആയിരിക്കുന്നു. സാം തിരുവനന്തപുരത്ത് റെയിൽവേയിൽ ടി ടി ആർ ആയി വർക്ക് ചെയ്യുന്നു .
ശരത് ജി മോഹൻ (ബ്ലെസ്സൻ ) കോട്ടയത്ത് ദീപിക പത്രത്തിൽ വർക്ക് ചെയ്യുന്നു. ഇളയമകൾ
ബ്ലെസ്സി പാമ്പാടിയിൽ സൈക്കോളജിക്കൽ കൗൺസിലിംഗ് ക്ലിനിക് നടത്തുന്നു.
റിട്ടയർമെന്റ് ലൈഫിൽ ആയിരിക്കുന്ന ശാന്തമ്മ മോഹൻ എന്ന 68 കാരി, അരനൂറ്റാണ്ടുമുൻപ് ആകാശത്തുനിന്ന് താഴേക്കു ചാടിയ പെൺകുട്ടി, ഇന്ന് കർത്താവിന്റെ കാഹളശബ്ദം കേൾക്കുമ്പോൾ ഉയരത്തിലേക്ക് പറക്കാമെന്ന ഉറച്ച വിശ്വാസത്താൽ ദൈവത്തിലാശ്രയിച്ചു കാത്തിരിക്കുന്നു.
ഹാലേലൂയ്യാ പത്രത്തിൽ നിന്ന് നിരന്തരം വാർത്തകൾ നിങ്ങളുടെ മൊബൈലിൽ ലഭിക്കുവാൻ ഇവിടെ ക്ലിക് ചെയ്ത് വാട്സ്ആപ് ഗൂപ്പിൽ ജോയിൻ ചെയ്യുക
