അതിജീവിക്കാം ഈ കാലഘട്ടത്തെ പ്രാർത്ഥനയോടെ

റവ. സന്തോഷ് ഈശോ
ഉത്തരേന്ത്യൻ മിഷൻ ലീഡർ
ഡയറക്ടർ, സോൾ വിന്നേഴ്‌സ് ഇന്ത്യ

ലോകം മുഴുവൻ ഇങ്ങനെ നിശ്ചലമായി പോകുമെന്ന് ആരെങ്കിലും ഊഹിച്ചിരുന്നോ? സഭാഹാളുകൾ ശൂന്യമാകുമെന്ന്, സൗഹൃദക്കൂട്ടായ്മകൾ പോലും ഇല്ലാതാകുമെന്ന്….? നാം ദീർഘകാലമായി കരുതിയിരുന്നത് എല്ലാം നമ്മുടെ നിയന്ത്രണത്തിലാണെന്നാണ്. എല്ലാം നമ്മുടെ പ്ലാനിനനുസരിച്ചാണ് ചലിക്കുന്നതെന്നാണ്. പക്ഷേ ഈ വൈറസ് നമുക്ക് നൽകിയ ഏറ്റവും വലിയ തിരിച്ചറിവ് എല്ലാം ദൈവത്തിന്റെ നിയന്ത്രണത്തിലാണെന്നതാണ്. അവന്റെ സഹായമില്ലാതെ മനുഷ്യന്റെ ഒരു പദ്ധതിയും വിജയിക്കില്ലെന്നതാണ്. എന്റെ ഹൃദയത്തിൽ ദൈവം തോന്നിച്ച ചില ചിന്തകൾ.
1. ദൈവം സകലത്തെയും നിയന്ത്രിക്കുന്നു. അതിനാൽ സംഭവിക്കുന്ന കാര്യങ്ങളെക്കുറിച്ച് നാം ആകുലപ്പെടേണ്ടതില്ല. നമ്മുടെ പല പദ്ധതികളും പ്ലാനുകളും ഈ പകർച്ചവ്യാധി മൂലം നടക്കാതെ പോയേക്കാം. ഒരു പക്ഷേ നിരവധി പേർക്ക് ജോലി നഷ്ടമാകും, സാമ്പത്തിക പ്രശ്‌നങ്ങൾ ഉണ്ടായേക്കാം. അപ്പോഴും ഓർക്കുക സകലത്തെയും നിയന്ത്രിക്കുന്ന ദൈവം ഒന്നല്ലെങ്കിൽ മറ്റൊരു മാർഗ്ഗത്തിലൂടെ കാര്യങ്ങൾ നേരെയാക്കും. അതിനാൽ ദൈവത്തിൽ ആശ്രയിക്കുക. അവൻ എന്താണ് പറയാൻ ഉദ്ദേശിക്കുന്നതെന്ന് കാതോർക്കുക… നമ്മുടെ പ്ലാനുകളെക്കുറിച്ചും പദ്ധതികളെക്കുറിച്ചുമുള്ള ദൈവത്തിന്റെ നിയോഗം എന്തെന്ന് തിരിച്ചറിയുക. നാമുമായി ബന്ധപ്പെട്ട എല്ലാവരെയും ഇതേ നിലയിൽ ദൈവഹിതം തിരിച്ചറിയാനും ദൈവത്തിൽ ആശ്രയിക്കാനുമായി പ്രോത്സാഹിപ്പിക്കുക.
2. നാം ഒറ്റയ്ക്കല്ല. ദൈവത്തിന്റെ ശരീരമാകുന്ന സഭയുടെ ഭാഗമാണ് നാം ഓരോരുത്തരും. അതിനാൽത്തന്നെ നമ്മുടെ സഹപ്രവർത്തകരുമായും സഹവിശ്വാസികളുമായും എല്ലാം നിരന്തരം ബന്ധപ്പെട്ടു കൊണ്ടിരിക്കുക. സോഷ്യൽ ഡിസ്റ്റൻസിംഗ് അനിവാര്യമാകയാൽ നേരിട്ടുള്ള കൂട്ടായ്മകൾ ഒരു പരിധി വരെ സാധ്യമല്ലെങ്കിലും വിർച്വൽ ഫെലോഷിപ്പുകളിലൂടെ ആ കുറവ് പരിഹരിക്കാവുന്നതാണ്. സാങ്കേതികവിദ്യയുടെ സാധ്യതകൾ ഉപയോഗപ്പെടുത്തുക.
ക്രിസ്തീയശുശ്രൂഷയുടെ ഭാഗമായവർ പ്രത്യേകാൽ ഓർക്കുക. ക്രിസ്തുവിന്റെ മനോഭാവത്തോടെ നമ്മുടെ സഭാജനങ്ങളെ മുന്നോട്ട് നയിക്കേണ്ടവരാണ് നാം (ഫിലി. 2:5-8). എല്ലാവരേയും സ്‌നേഹിക്കുകയും മറ്റുള്ളവരെ അങ്ങനെ സ്‌നേഹിക്കാൻ പഠിപ്പിക്കുകയും ചെയ്യുക (തീത്തോ. 2:115). സഹപ്രവർത്തകരുടെ നിർദ്ദേശങ്ങൾക്ക് വില കൽപ്പിക്കുക. ദൈവമാണ് നമ്മെ നയിക്കുന്നതെന്നും അവൻ ഭരമേൽപ്പിച്ച ശുശ്രൂഷയുടെ ഭാഗമാണ് ഓരോരുത്തരുമെന്ന് ബോധ്യപ്പെടുത്തുക.
3. ദൈവവചനധ്യാനവും പ്രാർത്ഥനയുമാണ് ഒരു ക്രിസ്തീയകുടുംബത്തിന്റെ അടിത്തറ. പ്രാർത്ഥന വർദ്ധിപ്പിക്കാനായി കുറച്ചുകൂടെ നല്ല അവസരത്തിനായി കാത്തിരിക്കേണ്ടതില്ല. പ്രാർത്ഥനയ്ക്ക് കൂടുതൽ സമയം കണ്ടെത്തുവാനും ഉപവാസപ്രാർത്ഥന ജീവിതത്തിന്റെ ഭാഗമാക്കാനുമൊക്കെ വിശ്വാസികളെയും നമ്മുടെ തലമുറകളെയും പരിശീലിപ്പിക്കുക.
4. മറ്റുള്ളവരെ കരുതുക. ലോക്ഡൗൺ ആണ്, സുവിശേഷപ്രവർത്തനസാധ്യതകൾ ഇല്ല, ഒരു പരസ്യയോഗം പോലും സാധ്യമല്ല; എന്നൊക്കെ പറഞ്ഞ് സുവിശേഷവേലയ്ക്ക് ലോക്ഡൗൺ പ്രഖ്യാപിച്ചവർ കാണും. സത്യത്തിൽ കണ്ണുതുറന്ന് നോക്കിയാൽ നമ്മുടെ ചുറ്റുവട്ടത്ത് അയൽപക്കങ്ങളിൽ കരുതലിന്റെ കരം നീട്ടേണ്ടുന്ന എത്രയോ ആളുകളെ കണ്ടെത്താം. ഈ മഹാമാരിയുടെ നെഗറ്റീവ് കാര്യങ്ങൾ പറഞ്ഞും ചിന്തിച്ചും നിരാശപ്പെടാതെ. ഇത് നമുക്ക് സമൂഹത്തിലേക്ക് ഇറങ്ങാനുള്ള, അവരെ സഹായിക്കാനുള്ള അവസരമാക്കി മാറ്റണം. ഇപ്പോൾ നമ്മൾ കൈ തുറന്നാൽ, പിന്നീട് നാം വാ തുറന്ന് സുവിശേഷം പറയുമ്പോൾ കേൾക്കുന്നവർക്ക് നന്നായി മനസ്സിലാകും.
5. സോഷ്യൽ മീഡിയയുടെ കാലമാണിത്. എല്ലാവരും ഫോണിൽ എത്രയോ മണിക്കൂറുകൾ പ്രതിദിനം ചിലവാകുന്നു. വാർത്ത, വിജ്ഞാനം, വിനോദം, ഗോസിപ്പ്, കോമഡി, അപവാദം, സെക്‌സ്, ആത്മീയം എല്ലാ നമ്മുടെ വിരൽത്തുമ്പിലുണ്ട്. നാം എന്ത് ചിന്തിക്കുന്നു, എന്ത് കാണുന്നു, എന്ത് കേൾക്കുന്നു. ഓരോരുത്തരും ബോധപൂർവ്വം സ്വയം നിരീക്ഷിക്കുക. നമ്മൾ എന്താണെന്ന് നമുക്ക് തന്നെ ബോധ്യമാകും. ഓരോ വിശ്വാസിയും പ്രാർത്ഥനാപൂർവ്വം സോഷ്യൽ മീഡിയായെ സമീപിക്കുക. ദൈവത്തിന്റെ പരിശുദ്ധാത്മാവിന്റെ നിയന്ത്രണത്തിനും നിർദ്ദേശങ്ങൾക്കും വിധേയപ്പെടുക. വചനത്തിന്റെ ഉപദേശങ്ങൾക്ക് അനുസരിച്ചു മാത്രം വിർച്വൽ മീഡിയയിൽ പ്രവേശിക്കുക.
മഹാമാരിയുടെ ഈ കാലഘട്ടത്തെ വിവേകത്തോടും, പ്രാർത്ഥനയോടും കൂടെ നമുക്ക് അതിജീവിക്കാം. ദൈവം സഹായിക്കും.